Laçın: Dövlətçilik yaddaşımızın və ərazi bütövlüyümüzün rəmzi
Elvina Əhmədova
Laçının şəhər kimi formalaşması və sonrakı inzibati inkişafı Azərbaycanın dövlətçilik tarixinin ayrılmaz hissəsidir. Strateji coğrafi mövqeyi, zəngin təbiəti, meşələri və yaylaqları Laçını Qarabağ bölgəsinin mühüm məkanlarından birinə çevirib. Bu torpaq Azərbaycan xalqının tarixi, mədəni irsi və milli kimliyi ilə sıx bağlıdır.
1992-ci il mayın 18-də Laçının Ermənistan silahlı qüvvələri tərəfindən işğal edilməsi Azərbaycanın ərazi bütövlüyünə qarşı həyata keçirilən işğal siyasətinin ağır mərhələlərindən biri oldu. Minlərlə insan doğma yurd yuvasından didərgin düşdü, şəhər və kəndlər dağıdıldı, tarixi və mədəni irsimizə ciddi ziyan vuruldu. Laçının işğalı Azərbaycanın coğrafi bütövlüyünə, təhlükəsizliyinə və dövlətçilik maraqlarına ağır zərbə idi.
Laçının işğalının strateji nəticələri də böyük oldu. Rayonun coğrafi mövqeyi Ermənistanla keçmiş Dağlıq Qarabağ Muxtar Vilayəti arasında birbaşa əlaqənin yaranmasına imkan verdi. Bu vəziyyət sonrakı illərdə Azərbaycan ərazilərinin işğalının genişlənməsinə və regionda təhlükəsizlik mühitinin daha da mürəkkəbləşməsinə təsir göstərdi. Laçının taleyi ərazi bütövlüyünün Azərbaycan dövləti üçün nə qədər fundamental məsələ olduğunu bir daha göstərdi.
İşğal illərində Azərbaycan dövləti və xalqı Laçının azad olunacağına olan inamını qorudu. Bu inam milli iradəyə, dövlətçilik düşüncəsinə və tarixi ədalətin bərpa olunacağına əminliyə söykənirdi. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə həyata keçirilən ardıcıl və məqsədyönlü siyasət nəticəsində ölkəmizin ərazi bütövlüyünün və suverenliyinin bərpası istiqamətində tarixi nəticələr əldə edildi. 2020-ci ildə İkinci Qarabağ müharibəsində qazanılan Zəfərdən sonra Laçının 1 dekabr 2020-ci ildə Azərbaycana qaytarılması bu tarixi yolun mühüm mərhələsi oldu.
Laçının azadlığı hərbi siyasi uğur olmaqla yanaşı, dövlətçilik baxımından da böyük tarixi hadisədir. Dövlətçilik ərazi üzərində milli iradənin, hüquqi hakimiyyətin və davamlı inkişafın təmin olunmasını tələb edir. Bu gün Laçında aparılan genişmiqyaslı bərpa və quruculuq işləri də dövlətimizin bu istiqamətdəki iradəsinin real ifadəsidir. İşğaldan azad edilmiş ərazilərin yenidən qurulması, insanların doğma torpaqlarına qayıdışının təmin edilməsi və regionun iqtisadi potensialının dirçəldilməsi Azərbaycan dövlətinin qarşısında duran mühüm strateji vəzifələrdəndir.
Laçının timsalında bir həqiqət aydın görünür: torpağın azadlığı onun hərbi yolla geri qaytarılması ilə başa çatmır. Əsl Zəfər həmin torpaqlarda həyatın yenidən qurulması, insanların öz yurdlarına qayıtması, tarixi irsin qorunması və gələcək nəsillərə təhlükəsiz, inkişaf edən Azərbaycan mirasının ötürülməsidir.
26 avqust Laçın Şəhəri Günü bu baxımdan həm keçmişimizi xatırlamaq, həm də gələcəyə baxmaq üçün mühüm gündür. Laçın bizim üçün itkilərin ağrısını, mübarizənin əzmini və Zəfərin qürurunu özündə birləşdirən bir şəhərdir. Bu gün Laçının azad və yenidən qurulan siması Azərbaycan dövlətinin gücünün, xalqımızın sarsılmaz iradəsinin və ərazi bütövlüyümüzün bərpasının canlı təcəssümüdür.
Laçın Azərbaycanın qalib dövlət olaraq gələcəyə inamla addımlamasının, dövlətçilik iradəsinin və milli birliyinin rəmzlərindən biridir. Burada qurulan yeni həyat həm Zəfərimizin nəticəsini, həm də bu Zəfəri gələcəyə daşıyan dövlətçilik iradəmizi nümayiş etdirir.
