Azərbaycan-Kamboca münasibətləri yeni, praktik əməkdaşlıq mərhələsinə qədəm qoyur

Xalidə  Poladova

YAP Suraxanı rayon təşkilatının üzvü

Suraxanı rayonu, 172 nömrəli tam orta ümumtəhsil məktəbinin müəllimi 

12 oktyabr 2026-cı il tarixində Kamboca Krallığının Baş naziri Hun Manet Prezident İlham Əliyevin dəvəti ilə Azərbaycana rəsmi səfərə gəlib və Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin Zirvə Görüşündə iştirak edib. Səfər çərçivəsində dövlət başçıları geniş tərkibdə görüş keçirib və mətbuata birgə bəyanat veriblər.

Prezident İlham Əliyev bəyanatında bildirib ki, Azərbaycan və Kamboca yaxşı dost və etibarlı tərəfdaşlardır və beynəlxalq təşkilatlar, xüsusilə BMT, Qoşulmama Hərəkatı və AQEM çərçivəsində fəal əməkdaşlıq edir, bir-birini dəstəkləyir. Qeyd olunub ki, Kamboca Azərbaycanın ASEAN-da müşahidəçi statusu əldə etmək səylərini ilk gündən dəstəkləyən ölkələrdəndir və parlamentlərarası əlaqələrdə də yüksək həmrəylik nümayiş etdirilir.

İqtisadi sahədə indiyə qədər ikitərəfli ticarət dövriyyəsi potensialı əks etdirməsə də, tərəflər ticarət və sərmayə qoyuluşu, birgə istehsal müəssisələrinin yaradılması, energetika və müdafiə sənayesi sahələrində hansı işləri görə biləcəklərini müəyyənləşdirmək barədə razılığa gəliblər. Bu məqsədlə ticarət əlaqələrinin inkişafı üçün konkret tədbirləri müəyyən edəcək birgə işçi qrupunun yaradılması və çərçivə sazişinin hazırlanması qərara alınıb, Bakıda biznes forum keçirilib və yaxın gələcəkdə ikitərəfli ticarət əlaqələrində böyük canlanmanın olacağı vurğulanıb.

Görüşün ən həssas mövzularından biri hər iki ölkə üçün ümumi problem olan mina məsələsi olub. Həm Azərbaycanın işğaldan azad edilmiş əraziləri, həm də Kamboca onilliklərdir davam edən müharibələrin mirası olaraq dünyada minalardan ən çox əziyyət çəkən ölkələrdəndir və bu sahədə təcrübə mübadiləsi və humanitar minatəmizləmə üzrə əməkdaşlıq müzakirə edilib.

Digər mühüm məqam Azərbaycanın dünyaca məşhur ASAN dövlət xidmətləri modelidir ki, bu sistem Kambocada da böyük maraq doğurur və Kamboca hökuməti onun tətbiqini öyrənmək istəyir. Təhsil sahəsində əlaqələrin tarixi 30 ildən artıqdır, Sovet İttifaqı dövründə yüzlərlə kambocalı tələbə məhz Azərbaycanda təhsil alıb və bu ənənə indi ADA Universiteti ilə Kambocanın Diplomatiya və Beynəlxalq Əlaqələr Milli İnstitutu arasında imzalanmış əməkdaşlıq haqqında Anlaşma Memorandumu ilə davam etdirilir.

Sonda hər iki lider vurğulayıb ki, dünyada sülh və təhlükəsizlik yalnız beynəlxalq hüquq normalarına, suverenlik və ərazi bütövlüyü prinsiplərinə hörmət əsasında təmin oluna bilər. Bu səfər 2014-cü ildə Kambocanın sabiq Baş naziri Hun Senin Azərbaycana tarixi səfərindən sonra əlaqələrdə ən böyük irəliləyiş hesab olunur və 30 ildən artıq tarixə malik Azərbaycan-Kamboca münasibətləri yeni, praktik əməkdaşlıq mərhələsinə qədəm qoyur.
S.S.Axundov adına