Ulu Öndərin şəxsi təşəbbüsü və qətiyyəti sayəsində 1978-ci ildə Azərbaycan SSR Konstitusiyasında Azərbaycan dilinin dövlət dili tanınıb
Almaz İsmayılova
YAP Suraxanı rayon təşkilatının üzvü
Suraxanı rayon 208 nömrəli tam orta məktəbin müəllimi
Dil hər bir millətin mənəvi siması, onun milli varlığının timsalıdır. Tarix göstərir ki, Azərbaycan dili müxtəlif dövrlərdə rəsmi dövlət dili kimi elan edilib. Bir müddət fəaliyyət göstərsə də, dövlət dili statusu uzun sürə bilməmişdir.
Azərbaycan dilinin həm ümumxalq dili, həm də dövlət dili kimi inkişafında Ulu Öndər Heydər Əliyevin misilsiz xidmətləri olub. Ulu Öndər Azərbaycan dilinə adi ünsiyyət vasitəsi kimi deyil, qədim tarixi, zəngin mədəniyyəti, müasir dünyada müəyyən ictimai-mədəni mövqeyi olan bir xalqın milli sərvəti kimi yanaşırdı. Ulu Öndər Heydər Əliyev qeyd edirdi: “Fəxr edə bilərik ki, bizim zəngin, böyük söz ehtiyatına malik olan Azərbaycan dilimiz var.’’
Hələ 1970-ci illərdən başlayaraq Ulu Öndər ana dilimizin qayğısına qalıb. Azərbaycan dilinin inkişafı üçün öz səyini əsirgəməyib. Ulu Öndərin şəxsi təşəbbüsü və qətiyyəti sayəsində 1978-ci ildə Azərbaycan SSR Konstitusiyasına Azərbaycan dilinin dövlət dili olması haqqında ayrıca maddə daxil edilib.
Azərbaycan dilinin siyasi hüquqi statusunun möhkəmləndirilməsi istiqamətində atılan addımlardan biri də Ulu Öndərin 2001 –ci ilin iyunun 18-də imzaladığı “Dövlət dilinin tətbiqi işinin təkmilləşdirilməsi haqqında” fərman oldu. Ulu Öndər dilimiz barədə söyləmişdir. “Bu gün iftixar hissi ilə deyə bilərik ki, Sovet hakimiyyəti illərində biz Azərbaycan dilini qoruyub saxladıq və inkişaf etdirdik. Azərbaycan dili indi çox yüksək səviyyədə, yəni onun qrammatik quruluşu, başqa səhələri səviyyəsində olan dildir’’
Xalqımızın milli sərvəti olan ana dilimizin inkişafına yönəlmiş qərarların qəbulu və həyata keçirilməsi Ulu Öndərin böyük tarixi xidmətlərindəndir. Görkəmli dövlət xadimi çıxışlarında şifahi nitqə üstünlük verib, yazılı məruzələrdən, demək olar ki, imtina edirdi. “Dil hər bir millətin mənliyinin əsasıdır. İnkişaf etmiş zəngin dil mədəniyyətinə sahib olan xalq əyilməzdir, ölməzdir” –deyən Ümummilli lider ana dili məsələsinə yeni səviyyədə - müstəqil dövlət quruculuğunun tələb etdiyi səviyyədə yanaşmağın nümunəsini yaratdı.
Ümummilli Lider deyirdi: “Dilimiz çox zəngin və ahəngdar dildir, dərin köklərə malikdir. Şəxsən mən öz ana dilimi çox sevir və bu dildə danışmağımla fəxr edirəm” Bəli, Heydər Əliyevin bu cəsarətli addımı Azərbaycan ziyalılarında ruh yüksəkliyi yaratdı. Bütün bunlar onu göstərir ki, Heydər Əliyevin hazırlayıb həyata keçirdiyi dil siyasəti Onun dövlət quruculuğu siyasətinin tərkib hissəsi olub.
Azərbaycan dilinin qorunması hamımızın vəzifəsidir. Ümummilli Liderin siyasi kursunu davam etdirən Prezident İlham Əliyev də dilimizə milli-adət ənənələrimizə qədim mədəniyyətimizə böyük həssaslıqla yanaşır.
