Nur bəxş edən işıqlı ömür yolu

Aprel ayının 15-i Azərbaycan tibb elminin görkəmli nümayəndəsi, akademik Zərifə Əliyevanın anım günüdür. Bu tarixdə onun zəngin elmi irsi, çoxşaxəli fəaliyyəti və cəmiyyət qarşısında xidmətləri bir daha dərin ehtiramla yad edilir. Zərifə Əliyeva 1923-cü ildə Naxçıvanın Şahtaxtı kəndində anadan olmuş, Azərbaycan tibb elminin inkişafında mühüm rol oynamışdır. O, Azərbaycan Dövlət Tibb İnstitutunu bitirdikdən sonra oftalmologiya sahəsində fəaliyyət göstərmiş, bu istiqamətdə dərin elmi araşdırmalar aparmışdır.

Alimin elmi fəaliyyətinin əsas istiqamətlərindən biri göz xəstəliklərinin, xüsusilə traxomanın öyrənilməsi və müalicəsi olmuşdur. Onun bu sahədə apardığı tədqiqatlar ölkədə bu xəstəliyin qarşısının alınmasında mühüm əhəmiyyət kəsb etmişdir. Eyni zamanda, Zərifə Əliyeva görmə orqanının peşə patologiyası sahəsində fundamental araşdırmalar apararaq, bu istiqamətdə yeni elmi yanaşmaların əsasını qoymuşdur.

Zərifə xanım Əliyevanın elmi fəaliyyəti yalnız nəzəri tədqiqatlarla məhdudlaşmamış, eyni zamanda praktiki səhiyyə sahəsində də mühüm nəticələr vermişdir. Onun təşəbbüsü və elmi yanaşmaları nəticəsində Azərbaycanda oftalmologiya sahəsində yeni istiqamətlər formalaşmış, bu sahənin inkişafına ciddi töhfələr verilmişdir. Görkəmli alim zəngin elmi irsi ilə yanaşı, yüksək mənəvi keyfiyyətləri, insanlara olan qayğıkeş münasibəti və peşəsinə sonsuz sədaqəti ilə də seçilmişdir. O, həyatını insan sağlamlığının qorunmasına, elmin inkişafına və gənc mütəxəssislərin yetişdirilməsinə həsr etmişdir.

Akademik Zərifə xanım Əliyevanın elmi-pedaqoji fəaliyyətində Azərbaycan Dövlət Həkimləri Təkmilləşdirmə İnstitutundakı fəaliyyəti xüsusi yer tutur. O, 1967-ci ildən etibarən institutun göz xəstəlikləri kafedrasında dosent kimi fəaliyyətə başlamış, sonralar professor və kafedra müdiri vəzifələrində çalışmışdır. Zərifə Əliyeva bu təhsil ocağında çalışdığı müddətdə həkimlərin ixtisasının artırılması, yüksək ixtisaslı kadrların hazırlanması istiqamətində mühüm işlər görmüşdür. Onun rəhbərliyi ilə təşkil olunan təkmilləşdirmə kursları, klinik müayinələr və elmi-praktik məşğələlər gənc oftalmoloqların peşəkar formalaşmasında böyük rol oynamışdır.

Zərifə xanım Əliyeva institutda dərs deməklə kifayətlənməmiş, eyni zamanda oftalmologiya sahəsində müxtəlif araşdırmalar aparmış və bu sahəyə dair dəyərli elmi əsərlər yazmışdır. Onun səyləri nəticəsində kafedrada elmi işlər daha da inkişaf etmiş, müayinə və müalicə imkanları genişlənmiş, yeni tibbi yanaşmalar tətbiq olunmağa başlanmışdır.

Ulu Öndər Heydər Əliyev akademik Zərifə xanım Əliyeva haqqında yüksək fikirlər söyləmiş, onun həm alim, həm də insan kimi müstəsna keyfiyyətlərini xüsusi vurğulamışdır. O qeyd edirdi ki, Zərifə xanım Əliyeva böyük alim olmaqla yanaşı, həm də yüksək mənəviyyata, insani dəyərlərə malik nadir şəxsiyyət idi. 

“Zərifə Əliyeva çox böyük alim, gözəl insan, qayğıkeş ana və sədaqətli həyat yoldaşı idi.” Ulu Öndərin bu fikirləri akademik Zərifə xanım Əliyevanın həyat və fəaliyyətinin mahiyyətini əks etdirir, onun yalnız elm sahəsində deyil, həm də ailə və cəmiyyət həyatında nə qədər yüksək nüfuz sahibi olduğunu göstərir.

Akademik Zərifə xanım Əliyeva öz zəngin elmi fəaliyyəti, yüksək mənəvi keyfiyyətləri və insanlara xidmətə həsr olunmuş ömür yolu ilə Azərbaycan tibb elminin tarixində silinməz iz qoymuşdur. Onun əziz xatirəsi daim ehtiramla yad edilir və həyat yolu gələcək nəsillər üçün örnək olaraq qalır.