Kənd təsərrüfatının yeni inkişaf modeli: Dövlət və özəl sektorun tərəfdaşlığı
Vəfa Babayeva
YAP Suraxanı rayon təşkilatının gənc fəal üzvü
Suraxanı rayonu, 277 saylı körpələr evi və uşaq bağçasının tərbiyəçi-müəllimi
Kənd təsərrüfatının inkişafı ilə bağlı keçirilmiş müşavirədə Prezident cənab İlham Əliyev özəl sektorun və investorların rolunu xüsusi vurğuladı. Bu da kənd təsərrüfatında yeni inkişaf modelinin dövlət və biznes tərəfdaşlığı əsasında qurulacağını göstərir. Burada əsas məqsəd yalnız dövlət vəsaiti hesabına deyil, yerli və xarici investisiyaların cəlb olunması yolu ilə aqrar sektorda daha böyük istehsal, emal və ixrac imkanlarının yaradılmasıdır. Bu yanaşma kənd təsərrüfatını ənənəvi subsidiyaya əsaslanan sahədən daha geniş investisiya mühitinə çevirmək məqsədi daşıyır.
Torpaqlardan səmərəli istifadə, onların elektron xəritələşdirilməsi, torpaq analizlərinin aparılması, süni intellekt və peyk texnologiyalarının tətbiqi ilə bağlı səsləndirilən fikirlər də aqrar siyasətdə yeni mərhələnin texnoloji əsaslarını göstərir. Bu, artıq kənd təsərrüfatının yalnız ənənəvi təcrübəyə deyil, dəqiq hesablamalara, rəqəmsal idarəetməyə və elmi yanaşmaya söykənən modelə keçidinin vacibliyini ortaya qoyur.
Su təminatı və müasir suvarma sistemlərinin genişləndirilməsi ilə bağlı verilən mesajlar da strateji əhəmiyyət daşıyır. Su ehtiyatlarının düzgün idarə olunması, yeni anbarların, kanalların və suvarma şəbəkələrinin qurulması məhsuldarlığın artırılması üçün əsas şərtlərdən biri kimi təqdim olunur. Bu, iqlim dəyişiklikləri dövründə kənd təsərrüfatının dayanıqlığının təmin olunması baxımından xüsusi əhəmiyyət kəsb edir.
Məhsuldarlığın artırılması, pambıqçılıq, intensiv bağçılıq, istixana təsərrüfatı, heyvandarlıq və digər sahələr üzrə konkret hədəflərin müəyyən olunması göstərir ki, qarşıdakı dövr üçün aqrar inkişaf artıq ümumi niyyətlər deyil, konkret rəqəmlər və nəticələr üzərində qurulacaq. Bu yanaşma kənd təsərrüfatında keyfiyyət dəyişikliklərinə nail olmaq üçün planlı və məqsədyönlü siyasətin həyata keçiriləcəyindən xəbər verir.
2026–2030-cu illəri əhatə edəcək yeni Dövlət Proqramı ilə bağlı səsləndirilən fikirlər onu göstərir ki, qarşıdakı mərhələdə kənd təsərrüfatının inkişafı daha böyük maliyyə resursları, dövlət dəstəyi və özəl sektor iştirakçılığı əsasında yeni mərhələyə qədəm qoyacaq. Bu proqramın əsas məqsədi yalnız istehsalın artırılması deyil, Azərbaycanın ərzaq təhlükəsizliyini daha etibarlı təmin etmək, idxaldan asılılığı azaltmaq, ixrac imkanlarını genişləndirmək və aqrar sektoru müasir iqtisadi inkişaf modelinin daha güclü sütunlarından birinə çevirməkdir.
Müşavirədə verilən mesajlar da məhz bu strateji hədəflərin qarşıdakı illərdə dövlət siyasətinin əsas istiqamətlərindən biri olacağını göstərir.
