Azərbaycan Şimali Makedoniya ilə münasibətlərin inkişafına əhəmiyyət verir
Xədicə Səmədzadə
YAP Suraxanı rayon təşkilatının fəal üzvü
Suraxanı rayonu, 87 nömrəli tam orta məktəbin Məktəbdənkənar və sinifdənxaric tərbiyə işi üzrə təşkilatçısı
Azərbaycan ilə Şimali Makedoniya arasında münasibətlər son illərdə yüksələn xətlə inkişaf edir. Bu iki ölkə arasında əlaqələr təkcə siyasi və diplomatik sahələrdə deyil, həm də iqtisadi, ticarət, mədəniyyət və təhsil sahələrində də güclənir.
Beləki, Azərbaycanın enerji sahəsindəki təcrübəsi və Şimali Makedoniyanın Avropa inteqrasiyası istiqamətindəki irəliləyişləri, qarşılıqlı faydalı əməkdaşlıq üçün geniş imkanlar yaradır. Hazırda Şimali Makedoniyanın Azərbaycanda akkreditə olunmuş səfirliyi fəaliyyət göstərir. Azərbaycan Şimali Makedoniya ilə münasibətlərin inkişafına əhəmiyyət verir və iki ölkə arasında əməkdaşlıq siyasi, iqtisadi və humanitar sahələri əhatə edir.
Martın 11-də Şimali Makedoniya Respublikasının Prezidenti Qordana Silyanovska-Davkovanın Bakıya rəsmi səfəri, Şimali Makedoniya ilə Azərbaycan münasibətlərinə yeni təkan verəcək. Bu cür yüksək səviyyəli səfərlər, iki ölkə arasındakı siyasi, iqtisadi və mədəni əlaqələrin inkişafına müsbət təsir göstərir.
Görüşlərdə müxtəlif sahələrdə əməkdaşlığın genişləndirilməsi, xüsusilə iqtisadiyyat, ticarət, nəqliyyat və enerji sahələrində yeni layihələr müzakirə olunub. Eyni zamanda, Şimali Makedoniya və Azərbaycan arasında mədəniyyət və təhsil sahələrində də qarşılıqlı əlaqələr artırılacaq. Bu səfər, həmçinin ölkələr arasında diplomatik münasibətlərin möhkəmlənməsinə və regional məsələlər üzrə birgə yanaşmaların formalaşmasına xidmət edir. Prezident İlham Əliyev Şimali Makedoniya Respublikasının Prezidenti Qordana Silyanovska-Davkovanın Azərbaycana səfəri zamanı mətbuata verdiyi bəyanatda ikitərəfli münasibətlərimi inkişafı üçün fəal iş aparıldığının deyib: “Şadam ki, ölkələrimiz arasında siyasi dialoq dinamik xarakter alır. Bizim xanım Prezidentlə ikinci görüşümüz qısa müddət ərzində bunun əyani sübutudur. Siyasi əlaqələrimizin inkişafı üçün əlavə tədbirlər görülməlidir, müvafiq dövlət qurumları təbii olaraq sıx təmasda olmalıdırlar. Eyni zamanda, iqtisadi sahədə, sərmayə qoyuluşu sahəsində imkanlar araşdırılmalıdır. Əfsuslar olsun ki, bu günə qədər ticari-iqtisadi sahədə o qədər böyük nəticələr əldə edilməyib. Ancaq ümid edirəm ki, Sizin rəsmi səfərinizdən və nümayəndə heyətlərinin təmaslarından sonra biz bu boşluğu da dolduracağıq”.
Xarici işlər nazirləri səviyyəsində də intensiv əlaqələr mövcuddur. İki ölkə arasında parlamentlərarası əlaqələrin möhkəmləndirilməsi məqsədilə Azərbaycan Respublikasının Milli Məclisində Azərbaycan-Şimali Makedoniya parlamentlərarası əlaqələr üzrə işçi qrupu fəaliyyət göstərir. Şimali Makedoniya Məclisində isə müvafiq parlamentlərarası dostluq qrupu yaradılmışdır.
Azərbaycan ilə Şimali Makedoniya arasında iqtisadi sahədə əməkdaşlıq inkişaf etdirilməkdədir. 2024-cü ilin əvvəlinə olan məlumata əsasən, Azərbaycanda 5 Şimali Makedoniya investisiyalı kommersiya qurumu qeydiyyatdan keçmiş, onlardan 3-ü aktiv fəaliyyət göstərir. İki ölkə arasında sərmayələrin təşviqi və qarşılıqlı qorunması haqqında saziş 2013-cü ildə imzalanmış və qüvvəyə minmişdir.
Bu göstəricilər Azərbaycan və Şimali Makedoniya arasında mövcud əməkdaşlığın daha da genişləndirilməsinin potensialını ortaya qoyur. Prezident İlham Əliyevin qeyd etdiyi kimi, siyasi, iqtisadi, enerji və humanitar sahələrdə əlaqələrin daha da inkişaf etdirilməsi iki ölkənin maraqlarına tam cavab verir və qarşılıqlı əməkdaşlığın daha yüksək səviyyəyə çatdırılmasına xidmət edir.
