Əsrin faciəsi-Xocalı
Nigar Qasımzadə
YAP Suraxanı rayon təşkilatının üzvü
Suraxanı rayonu, 76 nömrəli tam orta məktəbin müəllimi
XX əsr – Azərbaycan xalqının həyatına, tarixinə ən qanlı, fəlakət və faciələrlə, əzab və işgəncələrlə, həm də hünər və rəşadətlə dolu əsr kimi daxil olmuşdur. Bu əsrin demək olar ki, bütün onillikləri, qərinələri qanla yuyulmuşdur. Xocalı faciəsi bu qanlı dəryanın ən dərin, sarsıdıcı, işgəncəli, yırtıcılıq və vəhşiliklərlə dolu zirvəsi sayıla bilər.
Xocalı faciəsi XX əsrin sinəsində açdığı ən dərin qanlı yaradır. Əsrlər keçsə də, bu yaranın üstünü heç zaman daş-kəsək, ot-alaq basa bilməyəcək. Bu qırğın uzun illər dost, qardaş deyib torpağımızda yer verdiyimiz, çörəyimizi, suyumuzu əsirgəmədiyimiz qonşularımızın kininin, qəzəbinin, nankorluğunun pak ifadəsidir.
Bəşər tarixində ən amansız müharibələrin də aman verən qanunları olub. Həmin qanunlara görə uşaqlara, qocalara, qadınlara, silahsızlara, şikəst adamlara toxunulmur. Xocalı qırğını belə ali qanunların hamısını puç elədi. Xəyanət xəyanət gətirdi: Şuşa, Laçın kimi alınmaz-basılmaz qalalar da bu yolla düşmən pəncəsinə keçdi.
Ulu öndərimiz Heydər Əliyev 1993-cü ilin iyununda xalqın təkidli tələbi ilə hakimiyyətə qayıdandan sonra bir çox faciələrimiz kimi Xocalı soyqırımına da siyasi-hüquqi qiymət verilməsi mümkün olmuşdur. Heydər Əliyevin təşəbbüsü ilə Milli Məclis 1994-cü il fevralın 24-də “Xocalı soyqırımı günü haqqında” xüsusi qərar qəbul etmiş, sənəddə hadisənin baş vermə səbəbləri, günahkarlar təfsilatı ilə açıqlanmışdır.
Xocalı soyqırımının dünyaya tanıdılmasında Azərbaycan Respublikasının birinci vitse-prezidenti Mehriban xanım Əliyevanın ardıcıl və səmərəli fəaliyyəti də xüsusi qeyd olunmalıdır. Xocalı soyqırımı müxtəlif təşkilatlarda gündəmə gətirilmiş, bununla bağlı bir çox internet saytları yaradılmışdır. Bu sahədə Heydər Əliyev Fondunun vitse-prezidenti Leyla Əliyevanın xidmətləri də təqdirəlayiqdir.
Tarix həmişə dəyişir və yeni səhifələri yazılır. Lakin tarixin parlaq səhifələri heç zaman unudulmur. Vətən müharibəsindəki zəfər də məhz belə hadisələrdəndir. Müzəffər Ali Baş Komandanın rəhbərliyi ilə rəşadətli Azərbaycan Ordusu böyük şücaət və yüksək döyüş hazırlığı göstərərək 44 günlük Vətən müharibəsində 30 ilə yaxın işğal altında olan torpaqlarımızı geri qaytardı. Bu haqq döyüşündə məhv edilən düşmən qüvvələri içərisində Xocalı soyqırımının cəlladları da vardı. Tarixi qələbə qazanan ordumuz bu qətliamın günahsız qurbanlarının qısasını aldı. Xocalıda, eləcə də Qarabağ uğrunda həlak olan bütün şəhidlərimizin ruhu əbədi rahatlığa qovuşdu. Allah bütün şəhidlərimizə rəhmət eləsin.
