Suraxanı Rayonunda Beynəlxalq Müəllimlər Günü qeyd edilib
Oktyabrın 5-də Ulu Öndər Heydər Əliyevin 100 illik yubileyi ilə əlaqədar ölkəmizdə elan olunmuş “Heydər Əliyev İli” çərçivəsində Suraxanı Rayon İcra Hakimiyyətinin təşkilatçılığı ilə 5 oktyabr - Beynəlxalq Müəllimlər gününə həsr olunmuş təhsil konfransı keçirilib. Tədbirdə Suraxanı Rayon İcra Hakimiyyətinin başçısı Əziz Əzizov, Milli Məclisin deputatları Afət Həsənova, Etibar Əliyev, YAP Suraxanı Rayon Təşkilatının sədri Vüqar Seyidov, Suraxanı rayon Prokuroru Rəşid Mahmudov, Suraxanı rayon Polis İdarəsinin rəisi Şəhriyar Şəmşirli, Dövlət Təhlükəsizlik Xidmətinin Suraxanı rayon idarəsinin rəisi Rauf Məmmədov, Rayon Məhkəməsinin sədri Rasim Kazımov, Fövqəladə Hallar Nazirliyi Akademiyasının rəisi Baba Salayev, rayonun, idarə, müəssisə və təşkilatlarının nümayəndələri, müəllimlər iştirak ediblər.
Daha sonra Suraxanı Rayon İcra Hakimiyyətinin akt zalında keçirilən tədbirdə xalqımızın Ümummilli lideri Heydər Əliyevin və Azərbaycanın suverenliyi, müstəqilliyi, ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib və 5 oktyabr – Beynəlxalq Müəllimlər gününə həsr olunmuş video-çarx nümayiş olunub.
Konfransı giriş sözü ilə açan rayon icra hakimiyyətinin başçısı Əziz Əzizov Beynəlxalq Müəllimlər Günü münasibətilə təhsil işçilərini təbrik edib, onlara xoş arzularını bildirib. Ə.Əzizov qeyd edib ki, Ümummilli lider Heydər Əliyev tərəfindən təməli qoyulmuş inkişaf strategiyası Azərbaycan Respublikasının Prezidenti cənab İlham Əliyev tərəfindən böyük qətiyyət və uğurla davam etdirilir. Ölkəmizdə son illərdə təhsilin inkişafı ilə bağlı həyata keçirilən kompleks tədbirlər, dövlət başçımızın bu sahəyə olan böyük diqqətinin bariz nümunəsidir. Respublikamızın hər yerində olduğu kimi, Suraxanı rayonunda da təhsilin yüksək səviyyədə inkişaf etməsi, Heydər Əliyev Fondu tərəfindən yeni məktəb və bağçaların inşası və əsaslı şəkildə təmir olunması, maddi-texniki bazasının gücləndirilməsi istiqamətində mühüm işlər görülüb və görülməkdədir.
YAP Suraxanı Rayon Təşkilatının sədri Vüqar Seyidov çıxış edərək bildirib ki, bu gün Azərbaycan müəllimi çox ali bir missiyanı öz üzərinə götürüb və ləyaqətlə həyata keçirir. Azərbaycanda bütün təhsil ocaqlarının müəllimlərinin fəxarətlə sinələrini gərə-gərə öz yetirmələri ilə qürur duymağa haqqı vardır. Bütün məktəblərimizin şəhidi, qazisi, veteranı vardır. O gənclər ki, Qarabağı azad etmişlər, onlar heç vaxt Qarabağı görməmişlər. Düşmənlə bizim aramızda olan və bizi Zəfərə aparan ən böyük amil də elə məhz bu idi. Onlar nifrət hissi ilə, biz isə Vətənə məhəbbət hissi ilə gənclərimizi böyütdük. Biz bir qarış torpağımızı da güzəştə getməyəcək gənclik yetişdirərkən düşmən ancaq işğalçı, qorxaq, fərari gənclik yetişdirdi. Bu işdə siz müəllimlərin, təhsil işçilərinin müstəsna rolu vardır. Yerli təşkilatın sədri onu da vurğulamışdır ki, dövlət başçısı, YAP-ın sədri cənab İlham Əliyevin və Birinci vitse-prezident Mehriban xanım Əliyevanın təhsilimizin inkişafı naminə gördüyü işlər gələcək nəsillərin yetişməsinə verilən ən böyük dəyərdir. Bu gün ölkəmizin hər kəndində, hər şəhərində müasir təhsil kompeksləri fəaliyyət göstərməkdədir. Gənclərin təhsildə əldə etdiyi yüksək nailiyyətlər dövlətin bu sahəyə olan qayğısının təzahürüdür. Bu gün ölkəmizin hər yerində olduğu kimi doğma rayonumuz olan Suraxanı rayonunda da demək olar ki, bütün məktəblərimiz təmirlidir və bütün mümkün infrastrukturla təmin olunmuşdur. İstər Prezident cənab İlham Əliyev, istərsə də çox hörmətli Mehriban xanım Əliyeva təhsilə xüsusi diqqət yetirir və bilirlər ki, ölkənin gələcək inkişafı məhz təhsillə bağlıdır. Bu gün neft kapitalının insan kapitalına çevirilməsində ən böyük pay təhsilə ayrılıb.
Milli Məclisin deputatları Afət Həsənova, Etibar Əliyev, Suraxanı rayon Prokuroru Rəşid Mahmudov, Dövlət Təhlükəsizlik Xidmətinin Suraxanı rayon idarəsinin rəisi Rauf Məmmədov və məktəb direktorları çıxış edərək, Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyeva tərəfindən təhsilə göstərilən diqqət və qayğının nəticəsi olaraq son illərdə təhsil işçilərinin əməkhaqlarının artırılması, onların mükafatlandırılmaları, fəxri adlarla təltif edilmələri, müəllimlərin sosial müdafiəsinin gücləndirilməsi istiqamətində atılan məqsədyönlü addımların bu sahədə çalışanlara göstərilən yüksək dövlət qayğısının əyani təzahürü olduğunu, yaradılan bu şəraitə görə ölkə başçısına və birinci xanıma minnətdarlıqlarını bildiriblər.
Sonra Beynəlxalq Müəllimlər Günü münasibətilə rayonda fəaliyyət göstərən bir qrup təhsil işçisi pedaqoji sahədə səmərəli fəaliyyətlərinə, gənc nəslin təlim-tərbiyəsində qazandığı uğurlara görə Rayon İcra Hakimiyyəti başçısının fəxri fərmanları ilə təltif ediliblər.
Sonda təhsil işçiləri ilə xatirə şəkilləri çəkilib.
