Prezident İlham Əliyev “Euronews” televiziya kanalına verdiyi müsahibədə beynəlxalq məsələlərə dair fikirlərini bölüşüb
Mahirə Nahayeva
YAP Suraxanı rayon təşkilatının üzvü
Suraxanı rayonu, 285 nömrəli tam orta məktəbin müəllimi
Prezident İlham Əliyev “Euronews” televiziya kanalına verdiyi müsahibədə bir sıra mühüm beynəlxalq məsələlərə dair fikirlərini bölüşüb. O, əsasən qlobal siyasətdəki dəyişikliklər, beynəlxalq təşkilatların vəziyyəti, Cənubi Qafqazdakı geosiyasi vəziyyət və Azərbaycanın müstəqil və suveren siyasətinə dair öz yanaşmalarını təqdim edib. Prezident qeyd edib ki, XII Qlobal Bakı Forumunda iştirakçılar qlobal məsələlər barədə fikirlərini bölüşürlər və müzakirələr əsnasında müxtəlif yanaşmalar ortaya çıxır.
Forumun beynəlxalq məsələlərə yanaşmada mühüm rolu olduğunu vurğulayıb. İlham Əliyev müasir dövrdə mövcud olan dünya nizamının artıq keçmişdə qaldığını, yeni qaydaların müəyyənləşdirilməsi prosesinin baş verdiyini söyləyib. Onun sözlərinə görə, ölkələr daxili resurslarına güvənərək öz gələcəklərini qurmalıdırlar, çünki beynəlxalq hüququn selektiv tətbiqi və xarici yardıma əsaslanmaq, ölkələri zəiflədir və suverenliyini itirməyə səbəb ola bilər. Prezident bəzi beynəlxalq təşkilatların və qurumların zəifliyini və ya iflic vəziyyətində olduğunu bildirib. Bu səbəbdən ölkələrin ikitərəfli münasibətlərə daha çox önəm verəcəyi proqnozunu verib. Cənubi Qafqazın tarixdə münaqişə və qarşıdurmalarla tanındığını, ancaq hazırda nisbətən sakit bir dövr yaşandığını qeyd edib.
Prezident, regionda sabitlik və sülh təmin etmək üçün geniş təhlükəsizlik mexanizmlərinin yaradılmasına ehtiyac olduğunu vurğulayıb. Azərbaycanın hər zaman milli maraqlarına sadiq qaldığını və heç bir beynəlxalq təsisata arxalanmadan öz daxili resurslarına güvəndiyini bəyan edib. Azərbaycanın müstəqil şəkildə ərazi bütövlüyünü bərpa etməsi və gələcəyini qurması təcrübəsinin uğurlu olduğunu bildirib. Prezident, Ermənistanla hələ də sülh müqaviləsinin imzalanmadığını və bunun da sabitliyi təmin etmədiyini vurğulayıb. O, sülh sazişi imzalanana qədər bölgədə sabitliyin təmin olunmayacağını qeyd edib.
Dünya səhnəsində geosiyasi dəyişikliklərin hələ yeni başladığını və ABŞ-ın yeni administrasiyasının bu prosesdə mühüm rol oynadığını bildirib. O, ABŞ ilə Azərbaycanın münasibətlərindəki dəyişiklikləri müsbət qiymətləndirərək, güclü tərəfdaşlığın bərpası istiqamətində nikbin olduğunu vurğulayıb.
Bu müsahibə, Prezident İlham Əliyevin Azərbaycanın beynəlxalq mövqeyini və milli maraqlarını necə qoruduğunu, həmçinin dünya siyasi arenasında baş verən dəyişikliklərə necə yanaşdığını aydın şəkildə göstərir.
