İşğaldan azad edilən ərazilər uğurla məskunlaşdırılır
İşğaldan azad olunmuş ərazilərin bərpası və məskunlaşdırılması Azərbaycan dövlətinin qarşısında duran mühüm vəzifələrdən biridir. 2020-ci ildə Vətən müharibəsinin başa çatmasından sonra azad edilmiş ərazilərdə genişmiqyaslı quruculuq və bərpa işlərinə başlanılmışdır. Əsas məqsəd insanların öz doğma torpaqlarına təhlükəsiz və rahat şəkildə qayıtması üçün lazımi şərait yaratmaqdır.
İlk növbədə yaşayış məntəqələrinin yenidən qurulması, yolların, enerji və su təchizatı sistemlərinin yaradılması, məktəb, xəstəxana və digər sosial obyektlərin tikilməsi istiqamətində mühüm layihələr həyata leçirilir. Yeni salınan şəhər və kəndlər müasir infrastrukturla təmin olunur. Ağalı, Talış, Laçın, Füzuli, Xocalı və digər yaşayış məntəqələrində aparılan işlər bunun nümunələrindəndir.
Məskunlaşma yalnız evlərin tikilməsi ilə məhdudlaşmır. İnsanların burada yaşaması, işləməsi, təhsil alması və sosial xidmətlərdən istifadə etməsi üçün hərtərəfli şərait yaradılır. Ərazilərin minalardan təmizlənməsi də təhlükəsiz qayıdışın əsas şərtlərindən biridir.
Bununla yanaşı, bölgənin iqtisadi potensialından istifadə edilməsi, kənd təsərrüfatının, turizmin və sahibkarlığın inkişafı üçün yeni imkanlar yaradılır. Yeni müəssisələrin və iş yerlərinin yaradılması insanların burada daimi məskunlaşmasına və bölgənin iqtisadi həyatının canlanmasına xidmət edir.
Beləliklə, işğaldan azad olunmuş ərazilərdə həyata keçirilən bərpa və quruculuq işləri nəticəsində bu torpaqlar tədricən yenidən canlanır, insanların doğma yurdlarına qayıdışı təmin olunur və ərazilərin Azərbaycanın vahid sosial-iqtisadi məkanına inteqrasiyası güclənir. Yeni infrastrukturun yaradılması, iqtisadi imkanların genişləndirilməsi və təhlükəsizliyin təmin olunması bölgənin gələcək inkişafı üçün möhkəm əsas yaradır.
Bu proses azad olunmuş ərazilərin Azərbaycanın sosial-iqtisadi həyatına yenidən tam şəkildə qoşulmasına xidmət edir.
