Kambocanın Baş naziri Hun Manet ilə yüksəksəviyyəli görüşlər…
Fatimə Abbasova
YAP Suraxanı rayon təşkilatının gənc fəal üzvü
Ölkəmizlə ilə Kamboca Krallığı arasındakı strateji və regional əlaqələr, rəsmi Bakının Asiya-Sakit okean hövzəsi dövlətləri ilə çoxtərəfli xarici siyasət kursunun genişləndirilməsi strategiyasında xüsusi çəkiyə malikdir. İki ölkə arasında fundamental tərəfdaşlığın əsası 28 dekabr 1994-cü ildə diplomatik münasibətlərin qurulması ilə qoyulmuşdur. Ötən onilliklər ərzində formalaşan yüksəksəviyyəli siyasi dialoq, regional və qlobal təhlükəsizlik məsələlərində mövqelərin yaxınlığı, habelə beynəlxalq təşkilatlar çərçivəsində nümayiş etdirilən qarşılıqlı dəstək ikitərəfli əməkdaşlığın əsas hərəkətverici qüvvəsinə çevrilmişdir.
Birləşmiş Millətlər Təşkilatı (BMT), Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) daxilində sıx koordinasiyası beynəlxalq hüququn norma və prinsiplərinə sadiqliyin bariz nümunəsidir. Keçən il, yəni 2025-ci ildə xarici işlər nazirlikləri arasında həyata keçirilən siyasi məsləhətləşmələrin dördüncü raundu isə bu münasibətlərin institusional mexanizmlərini daha da möhkəmləndirmiş və gələcək fəaliyyət yol xəritəsini müəyyən etmişdir.
Mövcud siyasi etimad mühiti, öz növbəsində, iqtisadi və ticari əlaqələrin sürətləndirilməsi üçün əlverişli ekosistem formalaşdırır. Azərbaycan Prezidenti İlham Əliyev ilə Kambocanın Baş naziri Hun Manet arasında keçirilən yüksəksəviyyəli görüşlərdə hazırkı ticarət dövriyyəsinin real iqtisadi potensialı tam əks etdirmədiyi açıq şəkildə qeyd olunsa da, bu sahədə nəhəng və istifadə olunmamış imkanların mövcudluğu xüsusi vurğulanmışdır.
İkitərəfli iqtisadi layihələri, investisiya yatırımlarını və ticarət stimullarını praktiki müstəviyə daşımaq məqsədilə birgə işçi qrupunun təsis edilməsi institusional tərəfdaşlığın bariz göstəricisidir. Bununla yanaşı, hər iki ölkənin işgüzar dairələrini bir araya gətirən biznes forumlarının intensivləşdirilməsi, sahibkarlar arasında birbaşa və səmərəli kommunikasiya kanallarının qurulması və bazar imkanlarına dair qarşılıqlı məlumat mübadiləsinin genişləndirilməsi yaxın gələcəkdə qeyri-neft sektorunun inkişafına əhəmiyyətli töhfələr verə bilər.
Bu çoxşaxəli əlaqələrin hüquqi bazasını tamamlamaq və biznes mühitini optimallaşdırmaq məqsədilə bu həftə, 12 oktyabr 2026-cı ildə imzalanmış dövlətlərarası sənədlərin mübadiləsi münasibətlərdə tamamilə yeni bir səhifə açmışdır. Tərəflər arasında imzalanan iqtisadi və ticarət əməkdaşlığına dair Çərçivə Sazişi, eləcə də investisiya axınını sürətləndirəcək ikiqat vergitutmanın aradan qaldırılması və vergidən yayınmanın qarşısının alınması haqqında müqavilə hüquqi riskləri minimuma endirərək investorlar üçün cəlbedici şərait yaradır.
Eyni zamanda, humanitar və akademik inteqrasiyanı təmin etmək məqsədilə ADA Universiteti ilə Kambocanın Diplomatiya və Beynəlxalq Əlaqələr Milli İnstitutu arasında imzalanmış tərəfdaşlıq memorandumu elmi araşdırmaların, tələbə-müəllim mübadiləsinin və gənc diplomatların peşəkar hazırlığının keyfiyyətcə yeni mərhələyə qədəm qoymasını təmin edəcəkdir.
