Hövsan Sağlamlıq Mərkəzində tədbir keçirilmişdir
10 may 2024-cü il tarixində Hövsan Sağlamlıq Mərkəzində Ümummilli Lider Heydər Əliyevin anadan olmasının 101-ci ildönümünə həsr olunmuş tədbir keçirilmişdir. Tədbirdə YAP Suraxanı rayon təşkilatının sədr müavini Salman Əbdülov, Hövsan Sağlamlıq Mərkəzinin baş həkimi Ziyafət Tağıyeva və Sağlamlıq Mərkəzinin kollektivi iştirak etmişlər. Tədbirdə Ulu Öndər Heydər Əliyevin və Vətən uğrunda həlak olan şəhidlərimizin əziz xatirəsi 1 dəqiqəlik sükutla yad edilib, dövlət himni səsləndirilib.
Tədbiri giriş sözü ilə açan Ziyafət Tağıyeva Ümummilli Lider Heydər Əliyevin Azərbaycan tarixindəki misilsiz xidmətlərindən, müstəqil Azərbaycan dövlətinin qurulması, müstəqilliyin qorunub saxlanılması istiqamətində fəaliyyətindən bəhs etmişdir.
Sağlamlıq Mərkəzinin əməkdaşı Mirzəyev Mayis çıxış edərək Ulu Öndərin nəsillərə örnək olan həyat yolu, Azərbaycan dövlətinin möhkəmləndirilməsi və dünyada öz layiqli yerini tutması istiqamətində göstərdiyi siyasi fəaliyyət barədə. onun Azərbaycanın tarixinə, mədəniyyətinə, elm və təhsilinə, eləcə də səhiyyə və digər sahələrə verdiyi yüksək qiyməti vurğulayıb.
YAP Suraxanı rayon təşkilatının sədr müavini Salman Əbdülov çıxış edərək bildirmişdir ki, dahi şəxsiyyət Azərbaycanın bugünü və gələcəyi üçün möhkəm təməl yaratmış, məhz bu möhkəm təməl üzərində ucalan müasir Azərbaycan davamlı uğurları ilə dünyanın diqqətindədir. Azərbaycanın dünyaya Günəş kimi doğması Ulu Öndər Heydər Əliyevin ən böyük arzularından biri idi. Qısa zamanda bu istəyini reallığa çevirən dahi şəxsiyyət dünyanın müxtəlif ölkələrinə səpələnmiş soydaşlarımızın birliyini təmin etməklə yeganə problemimiz olan Qarabağ münaqişəsi ilə bağlı həqiqətlərin təbliğinə, erməni yalanlarının ifşasına nail oldu. Ümummilli Lider hər kəsə Vətəni sevməyi öyrətdi. Onun “Azərbaycan mənim ürəyimdir, Azərbaycan mənim nəfəsimdir, Azərbaycan mənim həyatımdır” çağırışı harada yaşamasından asılı olmayaraq bütün dünya azərbaycanlılarını bir amal ətrafında sıx birləşdirdi. Məhz bu birlik 44 günlük İkinci Qarabağ müharibəsində tarixi Zəfərimizdə öz sözünü dedi.
Sonra Ulu Öndər Heydər Əliyev haqqında video-çarx nümayiş olunub.
Tədbirin sonunda Hövsan Sağlamlıq Mərkəzinin həyətyanı sahəsində ağacəkmə aksiyası keçirilmişdir.
