“Dövlət Suverenliyi Günü”nün təsis edilməsi ölkəmizin milli mübarizə tarixində xüsusi önəm daşıyır

Azərbaycan xalqının dövlətçilik tarixi çoxəsrlik mübarizələrlə, böyük sınaqlarla və şərəfli qələbələrlə zəngindir. Hər bir xalq üçün öz taleyinə sahib olmaq, müstəqil dövlət qurmaq və onu inkişaf etdirmək ən böyük nailiyyətdir. Azərbaycan xalqı da tarixin müxtəlif mərhələlərində işğala, təzyiqlərə və məhrumiyyətlərə baxmayaraq, heç vaxt dövlətçilik iradəsindən dönməmiş, müstəqillik əzmini itirməmişdir.

Azərbaycan Respublikasında “Dövlət Suverenliyi Günü”nün təsis edilməsi ölkəmizin milli mübarizə tarixində xüsusi önəm daşıyır. Prezident İlham Əliyevin 19 sentyabr 2024-cü il tarixli sərəncamında vurğulandığı kimi: “Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir.”

Bu gün dövlət suverenliyi yalnız siyasi müstəqillik deyil, həm də xalqımızın milli qüruru və gələcək inkişafinın təminatıdır. XX əsrin sonlarından başlayaraq 30 ildən artıq davam edən işğal dövrü Azərbaycan xalqının dövlətçilik yolunda ən ağır sınaqlarından biri oldu. Lakin 2020-ci ilin 44 günlük Vətən müharibəsi ilə Azərbaycan tarixi Zəfərə imza atdı. Bu qələbə dövlətimizin suveren hüquqlarının bərpası yolunda dönüş nöqtəsi oldu.

Prezident İlham Əliyev 20 sentyabr 2024-cü ildə Qarabağ Universitetində çıxışında qeyd etmişdir: “Düz bir il bundan əvvəl qəhrəman Azərbaycan Ordusu dövlət suverenliyini tam bərpa etmişdir. Bir gündən az davam edən antiterror əməliyyatı nəticəsində separatçıların kökü kəsildi, Azərbaycan öz dövlət suverenliyini tam təmin etdi, beynəlxalq hüquq zəfər çaldı və Azərbaycan öz gücünü bir daha göstərdi.”

19 sentyabr 2024-cü il tarixində Prezident İlham Əliyevin imzaladığı sərəncamla 20 sentyabr “Dövlət Suverenliyi Günü” elan edildi. Bu qərar həm xalqımızın tarixi yaddaşını möhkəmləndirir, həm də gələcək nəsillərə müstəqilliyin qorunmasının nə qədər önəmli olduğunu xatırladır.

2025-ci ilin isə “Konstitusiya və Suverenlik İli” elan edilməsi dövlətçiliyimizin inkişafinda yeni mərhələdir. Bu il ərzində ölkənin bütün sahələrində suverenliyin möhkəmlənməsi, milli dəyərlərin qorunması və hüquqi dövlət quruculuğunun təkmilləşdirilməsi prioritet istiqamət kimi müəyyən edilmişdir. 20 Sentyabr – Dövlət Suverenliyi Günü Azərbaycan xalqının mübarizə iradəsinin, qəhrəman Ordumuzun rəşadətinin və dövlətimizin siyasi iradəsinin simvoludur. Bu gün biz yalnız qazanılmış Zəfəri deyil, həm də müstəqilliyimizin əbədi və dönməz olduğunu bütün dünyaya nümayiş etdiririk.