Dövlət suverenliyi hər bir xalq üçün ən böyük milli sərvətdir

Dövlət Suverenliyi Günü Prezidentin qətiyyətli siyasətinin təntənəsidir

Azərbaycan xalqı tarix boyu müstəqillik, azadlıq və suverenlik uğrunda mübarizə aparmışdır. Dövlət suverenliyi hər bir xalq üçün ən böyük milli sərvətdir. Bu gün ölkəmizin hər bir vətəndaşı fəxrlə deyə bilər ki, Azərbaycan dövləti öz müstəqilliyini, ərazi bütövlüyünü və suverenliyini tam təmin etmişdir.

Müstəqilliyimizin qorunub saxlanılmasında, dövlətçiliyimizin möhkəmlənməsində Ümummilli Lider Heydər Əliyevin tarixi xidmətləri danılmazdır. Onun uzaqgörən siyasəti nəticəsində Azərbaycan müstəqilliyini itirmədi, əksinə daha da möhkəmləndi. Bu gün isə Prezident İlham Əliyevin qətiyyətli rəhbərliyi ilə Azərbaycan dövlətçiliyi özünün ən qüdrətli dövrünü yaşayır.

Prezident İlham Əliyevin 19 sentyabr 2024-cü il tarixli Sərəncamı ilə təsis edilən 20 Sentyabr-Dövlət Suverenliyi Günü xalqımızın mübarizə yolunun, əzminin və qələbəsinin simvoludur. Prezident İlham Əliyev demişdir:“Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir.

Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin canı-qanı bahasına əldə edilmiş ərazi bütövlüyümüz, suverenliyimiz xalqımızın milli sərvətidir.”Bu fikirlər xalqımızın əsrlərlə davam edən mübarizəsinin, müstəqillik əzminin və qəhrəmanlıq ruhunun parlaq ifadəsidir. Azərbaycan xalqı tarixin ən çətin dövrlərində belə milli iradəsindən dönməmişdir.

2020-ci ildə 44 günlük Vətən müharibəsi ilə Azərbaycan torpaqlarının böyük hissəsini işğaldan azad etdi. Lakin separatçılıq hələ də qalıq kimi mövcud idi. 2023-cü ilin 20 sentyabrında isə Azərbaycan Ordusu qətiyyətli antiterror əməliyyatı keçirərək dövlətimizin suverenliyini tam şəkildə təmin etdi. Prezident İlham Əliyev bu tarixi hadisəni belə dəyərləndirmişdir: “Düz bir il bundan əvvəl qəhrəman Azərbaycan Ordusu dövlət suverenliyini tam bərpa etmişdir. Bir gündən az davam edən antiterror əməliyyatı nəticəsində separatçıların kökü kəsildi, Azərbaycan öz dövlət suverenliyini tam təmin etdi, beynəlxalq hüquqa zəfər çaldı və Azərbaycan öz gücünü bir daha göstərdi.” Bu sözlər Azərbaycan dövlətinin qətiyyətini, xalqımızın birliyini və ordumuzun gücünü nümayiş etdirir.

Prezident İlham Əliyevin rəhbərliyi altında Azərbaycan bir çox sahələrdə böyük uğurlara imza atmışdır:Ərazi bütövlüyünün bərpası - Qarabağımızın azad olunması ilə Azərbaycan tarixi ədaləti bərpa etdi. Dövlət suverenliyinin möhkəmləndirilməsi- 2023-cü il əməliyyatları ilə ölkəmizin tam suverenliyi təmin olundu. Beynəlxalq nüfuzun yüksəldilməsi -Azərbaycan bu gün regionun lider dövləti kimi çıxış edir, beynəlxalq arenada söz sahibidir.

Milli birliyin möhkəmlənməsi-xalq-dövlət-ordu birliyi Azərbaycanı qalib dövlətə çevirdi. Prezident İlham Əliyevin 28 dekabr 2024-cü ildə imzaladığı sərəncama görə, 2025-ci il ölkəmizdə “Konstitusiya və Suverenlik İli” elan edilmişdir ki, bu qərar Azərbaycanın dövlətçilik tarixində həm hüquqi-mənəvi, həm də tarixi uğurlu bir dönəmə çevrilmişdir.

Əziz oxucular, mən əslən Laçın rayonundanam. İllərlə həsrətini çəkdiyimiz torpaqlara qovuşmaq mənim üçün ən böyük qürurdur. Laçınımızın, Qarabağımızın azad olunması hər bir azərbaycanlı üçün milli qürur, tarixi ədalət və müqəddəs bir zəfərdir. Biz bu gün öz torpaqlarımıza sahib çıxmaqla gələcək nəsillərə ən böyük miras-qalibiyyət irsini ötürürük.

Prezident İlham Əliyev dəfələrlə vurğulamışdır ki, Azərbaycanın müstəqilliyi əbədi və dönməzdir. Bu, həm də gənc nəsil üçün böyük məsuliyyətdir. Bu gün biz azad, müstəqil və qalib bir dövlətdə böyüyürük.Bizim üzərimizə  düşən ən böyük vəzifə bu irsi qorumaq, dövlətə sədaqətlə xidmət etmək və Azərbaycanın daha qüdrətli gələcəyini qurmaqdır.

20 Sentyabr- Dövlət Suverenliyi Günü xalqımızın mübarizliyinin, dövlətçiliyimizin qüdrətinin və Prezident İlham Əliyevin qətiyyətli siyasətinin təntənəsidir. Bu gün bizə göstərir ki, müstəqillik əbədi, suverenlik isə dönməzdir.Qoy bu gün xalqımızın birliyinin, qələbələrinin və milli qürurunun əbədi rəmzi kimi tarixdə yaşasın!