COP29 təkcə iqlim tədbiri deyil, bu qlobalmiqyaslı toplantı özündə siyasi dialoqları, sülh çağırışlarını ehtiva edir
Vüsalə Qasımova
YAP Suraxanı rayon təşkilatının fəal üzvü
Suraxanı rayon Heydər Əliyev Mərkəzinin böyük elmi işçisi
Bu günlərdə on minlərlə əcnəbi qonağa evsahibliyi edən Azərbaycan COP29 kimi nüfuzlu tədbiri yüksək səviyyədə təşkil etməsi ilə elə ilk gündən etibarən diqqət mərkəzinə çevrilib. Respublikamız ətraf mühitin mühafizəsinə və iqlim dəyişmələrinin fəsadlarının aradan qaldırılması məsələlərinə xüsusi önəm verir və bu istiqamətdə vacib işlər görür. Buna görədir ki, ötən il ölkəmiz 200-ə yaxın dövlət tərəfindən yekdilliklə COP29-a sədr seçildi. Bu həm də Azərbaycana qlobal səviyyədə verilən dəyərin, göstərilən hörmətin təzahürüdür. Qeyd edək ki, Azərbaycan BMT-nin İqlim Dəyişmələri üzrə Çərçivə Konvensiyasına tərəf olmaqla qlobal iqlim dəyişmələrinə qarşı mübarizəyə qoşulub. Ölkəmiz 1990-cı illə müqayisədə 2030-cu ilə qədər istixana qazlarının miqdarını 35 faiz azaldılmasını hədəfləyir. 2030-cu ildən sonra isə daha iddialı hədəf müəyyən edilib ki, bu da 2050-ci ilə qədər istixana qazlarının miqdarını 40 faiz azaldılmasından ibarətdir.
Tam əminliklə deyə bilərik ki, COP29 təkcə iqlim tədbiri deyil, bu qlobalmiqyaslı toplantı özündə siyasi dialoqları, sülh çağırışlarını da ehtiva edir. Eyni zamanda BMT-nin bu tədbiri türk dünyası ailəsinin yeni yol xəritəsinin müəyyənləşdirilməsi istiqamətində də mühüm rol oynayır. Qardaş ölkələrin gələcək hərtərəfli əməkdaşlıqları üçün müxtəlif və yeni sahələr açır. Bu tədbirin ölkəmizin beynəlxalq imicinin daha da artmasına mühüm töhfə verməklə yanaşı, Azərbaycanın bəşəri dəyərlərə malik olduğunu bir daha nümayiş etdirəcək.
Prezident İlham Əliyevin noyabrın 12-də Bakıda keçirilən COP29 Liderlər Sammitinin açılış mərasimindəki çıxışı, Azərbaycanın iqlim dəyişikliyi ilə mübarizədəki mövqeyini və beynəlxalq səviyyədəki uğurlu fəaliyyətini göstərən mühüm məqamlarla zəngindir. Bu çıxışda, həmçinin Azərbaycanın iqlim məsələlərinə verdiyi əhəmiyyətin, qlobal iqlim siyasətindəki rolu və gələcək hədəfləri barədə ətraflı məlumat verilib.
Azərbaycanın qlobal iqlim dəyişikliyi ilə mübarizədə fəal iştirak etdiyini vurğulayan dövlətimizin başçısı, ölkənin bərpa olunan enerji mənbələrinə yönələn strateji təşəbbüslərini və yaşıl enerji siyasətini təbliğ edərək, bu məsələnin yalnız milli səviyyədə deyil, beynəlxalq səviyyədə koordinasiyalı şəkildə həll olunması gərəkdiyini bildirib. Azərbaycanın COP29-a ev sahibliyi etməsi, bu fəallığın və beynəlxalq ictimaiyyətin ölkəyə olan etimadının göstəricisi kimi təqdim olunub.
İqlim dəyişikliyi ilə mübarizədə beynəlxalq əməkdaşlığın vacibliyini qeyd edən cənab İlham Əliyev, inkişaf etmiş və inkişaf etməkdə olan ölkələr arasında balanslı və ədalətli qərarların qəbul edilməsi məsələsinə Azərbaycanın sədrlik edəcəyini açıqlayıb. Bu yanaşma, müxtəlif ölkələrin və regionların ehtiyaclarını və maraqlarını nəzərə alaraq, konsensusun əldə edilməsi məqsədini daşıyır. Bu cür əməkdaşlığın yalnız ölkələrin iqlim problemlərinin həll edilməsinə deyil, həm də sosial-iqtisadi inkişafın davamlı olmasına töhfə verəcəyi vurğulanıb.
Çıxışında yaşıl enerji məsələsi barədə geniş danışan dövlət başçısı Azərbaycanın enerji siyasətinin əsas prioritetlərindən birinin bərpa olunan enerji mənbələri olduğunu və ölkənin bu sahədə atdığı addımları nümayiş etdirdiyini qeyd edib. Azərbaycan, külək və günəş enerjisi kimi təmiz enerji mənbələrindən istifadə etməklə enerji balansını tənzimləyir və daha ekoloji təmiz enerji istehsal etməyi hədəfləyir. Burada məqsəd, qlobal səylərə töhfə vermək və öz daxili enerji bazarını gücləndirməkdir.
Azərbaycan enerji siyasətində yaşıl enerji sektorunu inkişaf etdirməklə həm daxili enerji istehsalını artırmaq, həm də beynəlxalq səviyyədə iqlim dəyişikliyi ilə mübarizəyə töhfə vermək istəyir. Cənab İlham Əliyev, Azərbaycanda bu sahədəki layihələrin artacağını və bu enerji növlərinin ölkənin ümumi enerji istehsalında böyük yer tutacağını bildirib.
Ümumiyyətlə qlobal iqlim dəyişikliyi və beynəlxalq sülhə aid məsələləırin bir –biri ilə sıx bağlı olduğunu nəzərə alsaq, COP29 qlobal problemlərin həllimə töhfə verəcəyi şəksizdir. COP29-un alternativ enerjinin yüksəlişinə təkan verməsi bərabərində yeniliklərə yol açacaq
