Azərbaycan-Vyetnam əlaqələri strateji tərəfdaşlıq səviyyəsinə yüksəldi
Emil Yusifov
YAP Suraxanı rayon təşkilatının fəal üzvü
Suraxanı rayonu, Əmircan Bələdiyyəsinin sədri
2025-ci il mayın 7-də Azərbaycan Respublikasının Prezidenti İlham Əliyev və Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lam arasında keçirilən görüş zamanı iki ölkə arasında münasibətlərin yeni mərhələyə qədəm qoyduğu bəyan edildi.
Prezident İlham Əliyev mətbuata verdiyi açıqlamada əminliyini ifadə etdi ki, bu səfərin nəticələri uğurlu olacaq və əldə edilmiş razılaşmalar konkret layihələrə çevriləcək. O bildirdi ki, Azərbaycan ilə Vyetnam arasında ticarət, iqtisadiyyat, mədəniyyət, təhsil, energetika, nəqliyyat və digər sahələr üzrə ciddi əməkdaşlıq potensialı mövcuddur.
Səfər çərçivəsində imzalanan sənədlər təkcə siyasi və iqtisadi əlaqələrin genişləndirilməsi ilə kifayətlənmir, həm də humanitar, texnoloji və elmi sahələrdə uzunmüddətli əməkdaşlıq üçün möhkəm təməl yaradır.
Prezident İlham Əliyevin vurğuladığı kimi, Azərbaycan və Vyetnam arasında müxtəlif istiqamətlər üzrə böyük əməkdaşlıq potensialı mövcuddur və bu səfər bu imkanların reallaşmasına təkan verəcək. Xüsusilə qeyd olunmalıdır ki, energetika, nəqliyyat və rəqəmsal inkişaf kimi sahələrdə əməkdaşlıq iki ölkənin milli maraqlarına cavab verən, qarşılıqlı faydaya əsaslanan bir yanaşmanı əks etdirir.
Vyetnamın liderinin Azərbaycana səfəri, iki ölkənin beynəlxalq təşkilatlar çərçivəsində də bir-birinə dəstək verməsi üçün yeni imkanlar açır. Azərbaycan və Vyetnam BMT, Qoşulmama Hərəkatı və digər beynəlxalq platformalarda bir-birini dəstəkləyən ölkələr kimi tanınır. Bu səfər isə həmin əməkdaşlığın praktiki sahələrə keçməsi baxımından xüsusi əhəmiyyət daşıyır.
Sənədlər arasında yer alan arxiv işi, mədəniyyət və turizm sahələrində əməkdaşlığa dair razılaşmalar isə iki xalq arasında qarşılıqlı anlaşma və dostluğun möhkəmlənməsinə xidmət edir. Xüsusilə mədəniyyət nazirləri arasında imzalanan Anlaşma Memorandumu çərçivəsində gələcəkdə birgə sərgilər, festivallar, mədəniyyət günləri kimi tədbirlərin keçirilməsi planlaşdırılır.
Eyni zamanda kiçik və orta biznes sahəsində əməkdaşlığın inkişafı, sahibkarların təcrübə mübadiləsi və birgə layihələrin reallaşdırılması iki ölkənin iqtisadi dinamizmini gücləndirəcək. İmzalanan sənədlər, həmçinin iki ölkənin müvafiq nazirlik və qurumları arasında institusional əlaqələrin qurulması və möhkəmləndirilməsi baxımından da əhəmiyyətlidir.
Bütövlükdə, bu səfər Azərbaycan-Vyetnam münasibətlərində yeni bir mərhələnin əsasını qoyur. İmzalanmış sənədlər qarşıdakı illərdə ölkələrimiz arasında sıx və çoxşaxəli əməkdaşlığın gerçəkləşəcəyinə əminlik yaradır. Prezident İlham Əliyevin dediyi kimi, bu razılaşmaların konkret layihələrə çevrilməsi hər iki xalq üçün böyük faydalar vəd edir.
