YAP Suraxanı rayon təşkilatının nümayəndələri şəhid Elnur Şahbazovun ailəsini ziyarət etmişlər
Yeni Azərbaycan Partiyası Suraxanı rayon təşkilatının sədri Vüqar Seyidov və təşkilatın nümayəndələri Yeni Suraxanı qəsəbəsi sakini olmuş, Vətən Müharibəsi şəhidi əsgər Şahbazov Elnur Qədir oğlunun ailəsini ziyarət etmiş, ailənin qayğıları ilə maraqlanmışlar.
Şəhidlərimizə olan dərin hörmət və ehtiramını bildirən yerli təşkilatın sədri Vüqar Seyidov demişdir ki, bütün şəhidlərimizin əziz xatirəsi hər zaman Azərbaycan xalqının qəlbində yaşayacaqdır. Görüş zamanı Ali Baş Komandanın rəhbərliyi ilə şanlı ordumuzun gücünün, qüdrətinin sayəsində işğaldan azad edilmiş torpaqlarımızda bu gün müqəddəs üçrəngli bayrağımızın dalğalanması naminə düşmən qarşısında bütün çətinliklərə sinə gərən əsgər və zabitlərimizin, hərbçilərimizin misilsiz şücaətlərinin gələcək nəsillər üçün örnək olduğu vurğulanmışdır. YAP Suraxanı rayon təşkilatının sədri Vüqar Seyidov çoxminli üzvlər adından yerli təşkilatının layihəsi olan Xarıbülbül təsviri üzərində şəhid Elnur Şahbazovun şəkili toxunmuş xalçanı ailəsinə təqdim etmişdir.
Qeyd edək ki, şəhid əsgər Şahbazov Elnur Qədir oğlu Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin müvafiq sərəncamları ilə “ Azərbaycan Bayrağı” ordeni, “Vətən uğrunda”, “Cəsur döyüşçü”, “Şuşanın azad olunmasına görə”, Xocavəndin azad olunmasına görə”, “Kəlbəcərin azad olunmasına görə” və “Fuzulinin azad olunmasına görə” medalları ilə təltif edilmişdir.
Göstərilən diqqət və qayğıya görə şəhidin ailə üzvləri cənab Prezident İlham Əliyevə, Birinci vitse-prezident çox hörmətli Mehriban xanım Əliyevaya və Yeni Azərbaycan Partiyasına öz dərin minnətdarlıqlarını bildirmişlər.
