Bu gün Yeni Azərbaycan Partiyası Suraxanı rayon təşkilatının inzibati binasında Bakı Uşaq və Gənclər Teatrının direktoru, bədii rəhbəri, Azərbaycan Respublikasının əməkdar artisti İntiqam Soltanla YAP Suraxanı rayon təşkilatının sədri Vüqar Seyidov arasında işgüzar görüş keçirilmişdir. Görüş zamanı yerli təşkilatının sədri əməkdar artisti salamlayaraq ona və teatrın bütün kollektivinə uğurlar arzulamışdır. Vüqar Seyidov Suraxanı rayonunda teatrın fəaliyyət göstərməsinin rayonun ictimai və mədəni həyatına müsbət təsir etdiyini bildirmişdir. Dövlət başçısı cənab İlham Əliyevin və çox hörmətli Mehriban xanım Əliyevanın Azərbaycan mədəniyyətinə göstərdikləri qayğıdan bəhs edən Vüqar Seyidov hər bir vətəndaş, məmur, ictimai xadim üçün Ali Dövlət rəhbərliyinin fəaliyyətinin etalon olduğunu vurğuladı.
YAP Suraxanı rayon təşkilatı tərəfindən müxtəlif istiqamətli tədbirlər həyata keçirildiyini bildirən təşkilat sədri bu tədbirlərin təşkilində Bakı Uşaq və Gənclər Teatrının da iştirak etməsinin məqsədəuyğun olduğunu nəzərə çatdırdı. Vüqar Seyidov xüsusi qeyd etmişdir ki, rayon ərazisində məhz uşaq və gənclər üçün nəzərdə tutulmuş bir teatrın fəaliyyət göstərməsi rayon gənclərinin vətənpərvər ruhda tərbiyəsində müstəsna xidmət göstərə bilər. Vüqar Seyidov bu il 20 illik yubileylərini qeyd edəcək teatr kollektivini təbrik etmiş və yaradıcı heyətə uğurlar arzulamışdır.
Dəvətə və səmimi münasibətə görə təşəkkür edən İntiqam Soltan teatrın 20 illik fəaliyyəti ilə bağlı məlumat vermişdir. Əməkdar artist hər zaman dövlətçilik ənənələrinin yaşadılması, gənclərin vətənpərvərlik ruhunda tərbiyəsi məqsədi ilə layihələr həyata keçirdiklərini bildirdi. Hər zaman dövlətin qayğısını hiss etdiklərini vurğulayan teatr rəhbəri YAP Suraxanı rayon təşkilatı ilə uzun müddət ərzində əməkdaşlıq etdiklərini və bundan sonra da əməkdaşlığa hazır olduqlarını xüsusi vurğuladı.
