Xarici Diplomatların Qarabağ Səfəri Ermənistanın Sülhə Hazır Olmadığını Sübut Edir
Məhəbbət Quliyeva
YAP Suraxanı rayon təşkilatının fəal üzvü
Ağciyər Xəstəlikləri Mərkəzinin doğum evinin əməkdaşı
Azərbaycanda akkreditə olunmuş diplomatik korpus nümayəndələrinin işğaldan azad edilmiş Qarabağ və Şərqi Zəngəzura reallaşdırdığı növbəti səfər, beynəlxalq birliyin Azərbaycanın suverenliyini və ərazi bütövlüyünü birmənalı şəkildə tanımasının növbəti əyani nümayişi oldu. Lakin bu mühüm diplomatik missiyaya Ermənistan cəmiyyətində, mediasında və rəsmi dairələrində göstərilən aqressiv, isterik reaksiya təəssüf doğurmaqla yanaşı, rəsmi İrəvanın sülh prosesində nə dərəcədə qeyri-səmimi olduğunu bir daha bütün çılpaqlığı ilə ortalığı qoydu.
Qarabağ və Şərqi Zəngəzur Azərbaycan Respublikasının beynəlxalq səviyyədə tanınmış suveren ərazisidir. Müstəqil bir dövlətin öz suveren torpaqlarında xarici diplomatların hərəkətini təşkil etməsi, onları aparılan genişmiqyaslı bərpa-quruculuq işləri ilə tanış etməsi tamamilə Azərbaycanın daxili işidir.
Ermənistan cəmiyyətinin xarici diplomatları bu humanitar və rəsmi addımlarına görə hədəfə alması, sosial şəbəkələrdə onlara qarşı "linç" kampaniyası yürütməsi heç bir hüquqi və mənəvi çərçivəyə sığmır. Bu cür yanaşma, Ermənistan rəhbərliyinin Azərbaycanın ərazi bütövlüyünü tanıması barədə verdiyi bəyanatların sadəcə manipulyasiya xarakteri daşıdığını və İrəvanın hələ də qonşu dövlətin daxili işlərinə müdaxilə etmək ambisiyasından əl çəkmədiyini göstərir.
Ermənistanın formalaşdırmağa çalışdığı ideoloji fon köklü dözümsüzlük və irqçilik prinsiplərinə əsaslanır. Necə ola bilər ki, Ermənistan tərəfi Azərbaycan torpaqlarında yerləşən Gəncəsər və Xudavəng monastırlarını saxtakarlıqla özününküləşdirməyə çalışır, lakin eyni zamanda öz ərazisindəki çoxəsrlik Azərbaycan tarixi-mədəni irsinin mövcudluğunu tamamilə inkar edir?
Bu gün erməni cəmiyyətində belə bir absurd və birtərəfli narrativ hakimdir: guya Azərbaycan ərazisində tarixən yalnız ermənilər yaşayıb, müasir Ermənistan ərazisində isə azərbaycanlılar heç vaxt mövcud olmayıb. Bu, açıq-aşkar rasist və ksenofob yanaşmadır. Azərbaycan torpaqlarında mövcud olmuş Qafqaz Albaniyasının zəngin mədəni və dini irsini inkar etmək, dünya tarix elminin qəbul etdiyi faktlara qarşı çıxmaq Ermənistanın həqiqətlərə qarşı dözümsüzlüyünün növbəti sübutudur. Azərbaycan Respublikasının ərazisindəki bütün tarixi, dini və mədəni abidələr mənşəyindən asılı olmayaraq Azərbaycan dövlətinə və xalqına məxsusdur və qanunla ən yüksək səviyyədə qorunur.
Təhlillər göstərir ki, xarici diplomatlara qarşı başladılan bu nifrət kampaniyası sadəcə marjinal müxalif qrupların fəaliyyəti deyil. Bu proses birbaşa Ermənistan hakimiyyətinin dirijorluğu ilə idarə olunur. Hakim partiyaya yaxın media resurslarında və sosial şəbəkə seqmentlərində bu mövzunun qəsdən alovlandırılması bunun bariz nümunəsidir.
Eyni zamanda, Ermənistan parlamenti sədrinin müavini Ruben Rubinyanın Azərbaycanın suveren hüquqlarını hədəf alan açıqlamaları rəsmi İrəvanın destruktiv mövqeyini ifşa edir. Ermənistan parlamentində 2022-ci ilin sentyabrında sərhəddə törədilən hərbi təxribatların icraçılarının xüsusi olaraq yad edilməsi sülh gündəliyinə deyil, revanşizm əhval-ruhiyyəsinin və nifrətin alovlandırılmasına xidmət edir. 2023-cü ilin tarixi reallıqlarından sonra sülhə məcbur edilən Paşinyan hakimiyyəti, bu cür kampaniyalarla sülh prosesini qəsdən manipulyasiya edir və ləngidir.
Ermənistanın ən böyük beynəlxalq cinayətlərindən biri də indiki Ermənistan (Qərbi Azərbaycan) ərazisində xalqımızın min illər boyu yaratdığı mədəni izləri qəsdən və amansızlıqla silməsidir. Azərbaycanlılara məxsus tarixi abidələr, qəbiristanlıqlar, məscidlər və tarixi yaşayış məskənləri tamamilə dağıdılıb və ya tanınmaz hala salınıb.
Ermənistan həm cəmiyyət, həm də dövlət olaraq anlamalıdır ki, revanşist xəyallarla, nifrət və tarixi saxtakarlıq kampaniyaları ilə bölgədə sabitliyə nail olmaq qeyri-mümkündür. Regionun gələcəyi qarşıdurmada deyil, beynəlxalq hüquqa, suverenliyə və ərazi bütövlüyünə qarşılıqlı hörmətdədir. Azərbaycan öz torpaqlarında istənilən beynəlxalq missiyanı qəbul etmək hüququna malikdir və Ermənistanın bu proseslərə mane olmaq cəhdləri iflasa məhkumdur.
