Şəhid Davud Məmmədli həsr olunmuş “Yarım qalan ömürlər” adlı tədbir keçirilmişdir.
23 aprel 2024-cü il tarixində Suraxanı rayon Heydər Əliyev Mərkəzində Şəhid Məmmədli Davud Fuad oğlu və Əhmədzadə İsgəndər Ramiz oğluna həsr olunmuş “Yarım qalan ömürlər” adlı tədbir keçirilmişdir.
Tədbirdə Suraxanı rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Elmar Hüseynov, YAP Suraxanı rayon Təşkilatının sədr müavini Salman Əbdülov, Əmircan qəsəbə Bələdiyyə sədri Cəmilə Ağayeva, şəhid ailələri, şəhid Davud Məmmədli və İsgəndər Əhmədzadənin ailə üzvləri, qohumları, həmçinin şəhidin məzun olduğu 84 saylı tam orta məktəbin müəllim və şagirdləri iştirak etmişdir.
Tədbir Azərbaycan Respublikasının Dövlət Himninin səsləndirilməsi, Azərbaycanın ərazi bütövlüyü uğrunda canından keçən şəhidlərimizin xatirəsinin sükutla yad edilməsi ilə başlamışdır. Şəhid Məmmədli Davudun həyat yolundan bəhs edən videoçarx nümayiş olunmuşdur. Suraxanı rayon Heydər Əliyev Mərkəzinin direktoru Xəyalə Mahmudova, Suraxanı rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Elmar Hüseynov, YAP Suraxanı rayon təşkilatının sədr müavini Salman Əbdülov, Əmircan qəsəbə Bələdiyyə sədri Cəmilə Ağayeva çıxış edərək mərkəzin ideoloji işində və gənclərin maariflənməsindəki aparıcı yerlərdən birini tutan vətənpərvərlik mövzusunun və şəhidlərimizin təbliğinin bu cür tədbirlərlə daha yadda qalan olduğunu bildirdilər.
Çıxış edənlər Vətən müharibəsindən, böyük siyasi iradənin və qəhrəman Vətən oğullarının ölkəmizə yaşatdığı tarixi zəfərdən sonra ölkəmizdəki ruh yüksəkliyinin və şəhid ailələrinin dəyərindən bəhs etdilər. Şəhid Davud Məmmədlinin ailə üzvləri və müəllimləri Südabə Məmmədova və Məlahət Alməmmədova onun məktəb illərindən danışdılar, xatirələrini bölüşdülər.
Tədbirin bədii hissəsində Azərbaycan Milli Konservatoriyasının tələbələri Manaf Quliyev və Xəqani Şahbazov, 84 saylı məktəbin şagirdləri çıxış etdilər. Sonda hər iki qəhrəman - Məmmədli Davud və Əhmədzadə İsgəndər haqqında Esmira Günəş tərəfindən yazılan “Şimşəkdən Dənizə” adlı kitabın təqdimatı oldu.
