Müasir təhsil proqramlarına çıxış əldə etmək imkanı Somalinin inkişafına fayda verəcək

Fevralın 11 –də Somali Respublikasının Prezidenti Hasan Şeyx Mahmud ölkəmizə ilk rəsmi səfərə gəldi. Bu ilk tarixi səfər hər iki ölkə arasında  qarşılıqlı  əlaqələrin inkişaf etdirilməsi üçün çox böyük önəmə malikdir. Azərbaycan Respublikasının Prezidenti cənab İlham Əliyev və Somali Federativ Respublikasının prezidenti Hasan Şeyx Mahmudun iştirakı ilə  səfər çərçivəsində imzalanmış sənədlər mübadiləsi mərasimi oldu. Bakıda imzalanmış  sazişlərə əsasən, iki ölkə arasında ticarət dövriyyəsinin artırılması və qarşılıqlı sərmayələrin təşviqi planlaşdırıldı.

Fevralın 12-də Azərbaycan Respublikasının Prezidenti  cənab İlham Əliyev və Somali Federativ Respublikasının Prezidenti Hasan Şeyx Mahmud mətbuata bəyanatlarla çıxış ediblər.

Əvvəlcə Azərbaycan Prezidenti cənab İlham Əliyev bəyanatla çıxış etmişdir: “Müzakirə etdiyimiz və edəcəyimiz sahələr sırasında, ən vaciblərindən biri təhsil sahəsidir. Təhsil sahəsində artıq ilkin nailiyyətlərimiz var.”

Somalidən bir sıra tələbə Azərbaycanda Heydər Əliyev adına təqaüd əsasında təhsil alır. Bu gün imzalanmış sənəd onların sayını artırmaq imkanını yaradacaq. İlkin mərhələdə on tələbə, sonra isə onların sayı daha çox ola bilər. Bir sözlə, onların univertsitetlərimizdə müasir təhsil proqramlarına çıxış əldə etmək imkanı olacaq və belə bir fürsət Somalinin inkişafına fayda verəcək.

Bu gün imzalanmış sənədlər ikitərəfli əlaqələrimizi çox sahələrdə inkişaf etdirməklə qarşılıqlı iradəmizi aydın şəkildə nümayiş etdirir. Əminəm ki, hazırda Bakıda imzalanmış bütün razılaşmalar həyata keçiriləcək və münasibətlərimizi daha yüksək səviyyəyə  qaldıracaq.

Daha sonra Somali Prezidenti Hasan Şeyx Mahmud  bəyanatla çıxış edib. “Bu gün  imzaladığımız sazişlər Azərbaycanın təcrübəsindən istifadə etmək üçün strukturlu çərçivə rolunu oynayır, həmçinin ölkələrimiz və xalqlarımız üçün yeni imkanlar açır.”