Düşənbədən səslənən dostluq mesajı: Cənab İlham Əliyevdən regional həmrəyliyə çağırış
Nəsib İsmayılov
YAP Suraxanı rayon təşkilatının ƏPT-nin sədri
Suraxanı rayonu, Bülbülə Bələdiyyəsinin sədri
MDB Dövlət Başçıları Şurasının oktyabrın 10-da Düşənbədə keçirilən iclası ölkələr arasında strateji əməkdaşlığın dərinləşməsi baxımından xüsusi əhəmiyyət daşıyırdı. Bu toplantıda Azərbaycan Respublikasının Prezidenti cənab İlham Əliyevin çıxışı regionun siyasi və mədəni mənzərəsinə yeni bir baxış təqdim etdi. Prezident həm Tacikistanla münasibətlərin inkişafından, həm də MDB məkanında baş verən müsbət proseslərdən bəhs edərək, birliyin gələcək istiqamətləri üçün aydın mesajlar verdi. Onun nitqi həm dostluq ruhunun, həm də qarşılıqlı hörmətin regiondakı sabitliyin əsas dayağı olduğunu nümayiş etdirdi.
Azərbaycan Prezidenti çıxışına Tacikistan xalqına ünvanladığı səmimi təbriklərlə başladı. O, Prezidentin rəhbərliyi altında Tacikistanın əldə etdiyi iqtisadi və sosial uğurları yüksək dəyərləndirdi, paytaxt Düşənbənin son illərdə keçdiyi inkişaf yolundan məmnunluğunu ifadə etdi.
Prezident cənab İlham Əliyev bildirdi ki, şəhərin yeni siması Tacikistanın sürətli tərəqqisinin göstəricisidir və bu dəyişikliklər dost ölkə kimi Azərbaycanı da sevindirir. O, şəhərsalma və müasir infrastruktur sahəsində əldə olunan nailiyyətlərin regionda əməkdaşlıq üçün ilhamverici nümunə olduğunu vurğuladı.
Dövlət başçısı qeyd etdi ki, Azərbaycan və Tacikistan arasında münasibətlər qarşılıqlı etimad, səmimiyyət və dostluq üzərində qurulub. Bu əməkdaşlıq təkcə siyasi deyil, həm də iqtisadi və humanitar istiqamətlərdə özünü göstərir. Prezident cənab İlham Əliyev vurğuladı ki, iki ölkə arasında artan əməkdaşlıq regionda sabitliyin qorunmasına və qarşılıqlı maraqların təmin olunmasına xidmət edir. O, münasibətlərin gələcəkdə daha da genişlənməsi üçün böyük potensialın mövcud olduğunu diqqətə çatdırdı. Azərbaycan və Tacikistanın qarşılıqlı dəstək ənənəsi MDB çərçivəsində əməkdaşlığın daha məhsuldar şəkildə inkişafına töhfə verir.
Prezident cənab İlham Əliyev çıxışında Azərbaycanın Şərqi Zəngəzur bölgəsinin incisi olan Laçının bu il MDB-nin mədəniyyət paytaxtı seçilməsini xüsusi vurğuladı. Dövlət başçısı bu qərara görə MDB ölkələrinin liderlərinə təşəkkürünü bildirdi. Laçında keçirilən “MDB-nin mədəniyyət paytaxtı İli” tədbiri təkcə Azərbaycanın mədəni irsinin təqdimatı deyil, həm də işğaldan azad edilmiş torpaqların sürətli bərpasının göstəricisi oldu. Prezident qeyd etdi ki, bir vaxtlar tamamilə dağıdılmış Laçın bu gün müasir şəhər infrastrukturu, mədəni məkanları və abad həyatı ilə seçilir. Bu isə Azərbaycanın güclü dövlət iradəsinin və xalqının quruculuq əzminin bariz nümunəsidir.
Dövlət başçısı çıxışında MDB məkanında keçirilən mühüm idman tədbiri – III MDB Oyunları barədə də geniş bəhs etdi. 2025-ci ilin payızında Gəncə şəhərində və Azərbaycanın digər altı bölgəsində keçirilən bu oyunlar həm idman bayramına, həm də dostluq rəmzinə çevrildi. Oyunlarda 13 ölkədən 1600-dən çox idmançının iştirakı, birliyin gücünü və region xalqlarının bir araya gəlmək istəyini nümayiş etdirdi. Prezident cənab İlham Əliyev bildirdi ki, bu kimi beynəlxalq tədbirlər yalnız idman nailiyyətlərini deyil, xalqlar arasında mədəni və mənəvi yaxınlığı da möhkəmləndirir.
Prezident cənab İlham Əliyevin Düşənbədəki çıxışı Azərbaycanın MDB məkanında aparıcı rol oynadığını bir daha sübut etdi. Onun mesajları əməkdaşlığın yalnız rəsmi səviyyədə deyil, xalqdan-xalqa münasibətlərdə də dərinləşməsinin vacibliyini göstərdi.
Azərbaycan bu gün həm dostluq körpüləri quran, həm də mədəni, humanitar və idman sahələrində təşəbbüslərlə çıxış edən dövlət kimi tanınır. Prezidentin çıxışında səsləndirdiyi fikirlər göstərdi ki, qarşılıqlı hörmət, bərabərlik və birgə inkişaf prinsipləri üzərində qurulan münasibətlər gələcəkdə MDB məkanında sabitliyin və rifahın təminatçısı olacaq.
