Azərbaycan bayrağının beynəlxalq yarışlarda yüksəlməsi hər bir vətəndaş üçün böyük qürur mənbəyidir
Elvina Əhmədova
YAP Suraxanı rayon təşkilatının ƏPT-nin sədr müavini
Prezident cənab İlham Əliyev tərəfindən Avropa çempionatında komanda hesabında çempion olmuş güləşçilərlə keçirilən görüş Azərbaycan idmanının uğur salnaməsində mühüm yer tutan hadisələrdən biri kimi yadda qaldı. Dövlət başçısı çıxışında milli komandamızı səmimi qəlbdən təbrik edərək bu qələbənin yalnız idman uğuru deyil, həm də milli qürur mənbəyi olduğunu xüsusi vurğuladı. Onun sözlərinə görə, Avropa Güləş Çempionatı kimi mötəbər turnirdə komanda hesabında birinci olmaq böyük zəhmətin, peşəkarlığın və güclü iradənin nəticəsidir.
Prezident qeyd etdi ki, bu gün dünya və Avropa miqyasında güləş üzrə rəqabət son dərəcə gərgindir. Müxtəlif ölkələrin tanınmış idmançıları yüksək nəticələr göstərir, hər bir görüş böyük mübarizə şəraitində keçir. Belə bir fonda Azərbaycan güləşçilərinin üstünlük qazanması onların həm fiziki hazırlığının, həm də psixoloji dözümlülüyünün yüksək səviyyədə olduğunu göstərir. Dövlət başçısı bəzi yarışları şəxsən izlədiyini bildirərək vurğuladı ki, idmançılarımız rəqiblərini ədalətli və inamlı mübarizədə məğlub ediblər.
Çıxışda güləşin Azərbaycanda köklü ənənələrə malik olduğu xüsusi qeyd olundu. Prezident bildirdi ki, bu ənənələr bu gün də uğurla davam etdirilir və yeni nəsil güləşçilər əvvəlki nəsillərin yolunu layiqincə davam etdirir. Xüsusilə sevindirici hal kimi vurğulandı ki, təkcə tanınmış və təcrübəli idmançılar deyil, gənc güləşçilər də beynəlxalq arenada böyük nailiyyətlər əldə edirlər. Bu isə ölkədə seleksiya və məşq sisteminin düzgün qurulduğunu, gələcək üçün möhkəm kadr bazasının formalaşdığını göstərir.
Dövlət başçısı federasiyanın fəaliyyətinə də toxunaraq bildirdi ki, bu uğurlarda məşqçilərin və idman mütəxəssislərinin əməyi böyükdür. O, federasiya rəhbərliyini, məşqçiləri və əlbəttə ki, idmançıların özlərini təbrik etdi. Qeyd edildi ki, Azərbaycan bayrağının beynəlxalq yarışlarda yüksəlməsi hər bir vətəndaş üçün böyük qürur mənbəyidir və bu qələbələr xalqımıza sevinc bəxş edir.
Prezident İlham Əliyev idmanın cəmiyyət həyatındakı roluna da geniş yer ayırdı. Onun sözlərinə görə, idman yalnız fiziki fəaliyyət sahəsi deyil, həm də gənc nəslin formalaşmasında mühüm vasitədir. İdman uğurları gəncləri vətənpərvərlik ruhunda tərbiyə edir, onları sağlam həyat tərzinə təşviq edir və ölkəyə bağlılığı gücləndirir. Bu baxımdan idmana göstərilən dövlət qayğısı strateji əhəmiyyət daşıyır.
Çıxış zamanı Azərbaycanın idman sahəsində qazandığı ümumi nailiyyətlər də diqqətə çatdırıldı. Prezident qeyd etdi ki, ölkəmiz həm Olimpiya Oyunları, həm də dünya və Avropa çempionatlarında daim yüksək nəticələr göstərir. Bu uğurlar təsadüfi deyil, məqsədyönlü siyasətin və uzunmüddətli inkişaf strategiyasının nəticəsidir. Ölkənin müxtəlif bölgələrində inşa olunmuş Olimpiya idman kompleksləri və müasir idman zalları gənclərin idmana cəlb olunmasına geniş imkanlar yaradır.
Xüsusilə vurğulandı ki, Avropa çempionatında həm yunan-Roma, həm sərbəst, həm də qadın güləşi üzrə əldə olunan nəticələr Azərbaycanın bu sahədə kompleks inkişaf etdiyini sübut edir. Qadın güləşçilərin medal qazanması da mühüm nailiyyət kimi dəyərləndirildi. Prezident gələcəkdə qadın idmançıların daha böyük uğurlara imza atacağına əminliyini ifadə etdi.
Görüşün yekununda dövlət başçısı idmançılara gələcək yarışlarda da uğurlar arzuladı və əminliyini bildirdi ki, Azərbaycan idmanı bundan sonra da yeni zirvələr fəth edəcək. Bu görüş bir daha sübut etdi ki, ölkədə idmana göstərilən diqqət və qayğı davamlı xarakter daşıyır və əldə olunan uğurlar sistemli inkişafın məntiqi nəticəsidir.
