“44” bədii filmi YAP Suraxanı rayon təşkilatının fəallarına təqdim olunmuşdur
8 Noyabr – Zəfər Günü münasibətilə CineMastercard kinoteatrlar şəbəkəsinin Bakıxanov Mall filialında xüsusi film nümayişi təşkil olunub. Tədbirdə Azərbaycan Respublikası Mədəniyyət Nazirliyi, Azərbaycan Respublikasının Kino Agentliyi və Bakı Media Mərkəzinin dəstəyi ilə ərsəyə gələn “44” bədii filmi YAP Suraxanı rayon təşkilatının fəallarına təqdim edilib.
4 noyabr 2026-cı il tarixində baş tutan təqdimat mərasimində YAP Suraxanı rayon təşkilatının sədri Vüqar Seyidov, yerli təşkilatın aparat əməkdaşları, şəhid ailələrinin üzvləri, qazilər və partiya fəalları iştirak ediblər.
Filmin nümayişindən öncə çıxış edən YAP Suraxanı rayon təşkilatının sədri Vüqar Seyidov bildirib: "“44” bədii filmi sadəcə bir kino ekran işi deyil. Bu film Müzəffər Ali Baş Komandan İlham Əliyevin rəhbərliyi ilə Azərbaycan xalqının polad iradəsinin, sarsılmaz birliyinin və Zəfər Gününün əsasını qoyan tarixi qələbəmizin vizual salnaməsidir. Bu gün hər birimizin qəlbində böyük bir qürur və dərin bir ehtiram hissi var. Bizə o şanlı günləri yenidən yaşadan bu sənət əsəri sıradan bir hərbi dram deyil. Bu film Şuşa uğrunda döyüşlərdə dastan yazan, xalqımızın milli qürurunu bərpa edən qəhrəman oğullarımızın, canını Vətənə fəda etmiş şəhidlərimizin və qazilərimizin canlı xatirəsidir".
Rəsmi hissənin ardından “44” bədii filmi nümayiş etdirilib. Ekran işi tədbir iştirakçıları tərəfindən böyük maraq və duyğu dolu anlarla qarşılanıb.
