Əsrlər də, minilliklər də keçsə vətən sizi unutmayacaq
Mələk Məmmədova
YAP Suraxanı rayon təşkilatının üzvü
Suraxanı rayonu, 154 nömrəli tam orta məktəbin müəllimi
Hər xalqın tarixində həm qürurla, həm də acı ilə xatırladığı günlər olur. 20 Yanvar - Azərbaycan xalqının yaddaşında bu hər iki hissi birləşdirən, Azərbaycan xalqının müstəqillik mübarizəsinin şanlı və eyni zamanda ağrılı səhifələrindən biridir. Milli birlik və vətənpərvərliyin simvoluna çevrilmiş 20 Yanvar faciəsi xalqımızın öz suverenliyi uğrunda apardığı mübarizənin şərəfli tarixidir.
Azərbaycan xalqı tarixin heç bir mərhələsində əsarətlə barışmayıb. Xalqımızın igid oğulları və qızları hər zaman azadlığı, müstəqilliyi, suverenliyi, şərəflə yaşamağı canından əziz tutmuşdur. 1990-cı il Yanvarın 20-si Azərbaycan xalqı bir daha dünyaya sübut etdi ki, onun iradəsi əyilməzdir və heç bir güc onun azadlıq istəyini boğmağa qadir deyil. Həmin gün yüzlərlə insanın qanı ilə Azərbaycanın müstəqilliyə gedən yolu açıldı, zamanla möcüzəyə çevrilən bir qələbənin başlanğıcı oldu.
XX əsrin 80-ci illərinin sonunda SSRİ rəhbərliyinin ayrı-seçkilik siyasətinə,soydaşlarımızın indiki Ermənistan ərazisindəki tarixi torpaqlarından deportasiya edilməsinə və Ermənistanın Qarabağa qarşı əsassız ərazi iddialarına qarşı çıxan Azərbaycan xalqının başladığı milli azadlıq hərəkatı Moskvanı qorxuya salır. Onlar xalqı qorxutmaq və bu hərəkatı güc yolu ilə yatırmaq üçün təpədən dırnağa qədər silahlanmış Sovet ordusunu əliyalın xalqın üzərinə göndərirlər. Üstəlik Bakıda tətbiq edilən fövqəladə vəziyyət haqqında xalqı xəbərsiz qoymaq, Azərbaycanı informasiya blokadasına almaq və xalqın haqq səsini boğmaq üçün yanvarın 19-da respublika televiziyasının enerji blokunu partladırlar.
Həmin gecə sovet ordusunun Bakını zəbt etməsi xüsusi qəddarlıqla və misilsiz vəhşiliklə müşayiət olunur,yüzlərlə günahsız insan sovet ordusunun bu vəhşiliyinin qurbanı olur.
Hər zaman xalqına sonsuz sevgisi ilə seçilən Heydər Əliyev bu haqsızlığa dözə bilmir. O, Azərbaycanın Moskvadakı daimi nümayəndəliyinə gedərək sovet rəhbərliyinə sərt etirazını bildirir.Onun bu cəsarətli mövqeyi 20 Yanvar faciəsinə qarşı ilk ciddi və açıq etiraz idi. Qanlı Yanvar faciəsinə dövlət səviyyəsində tam siyasi-hüquqi qiymət verilməsi də Heydər Əliyevin hakimiyyətə qayıdışından sonra baş tutmuşdur.Həmçinin Heydər Əliyev şəhidləri və şəhid ailələrini də heç vaxt diqqətdən kənarda qoymamışdır.
Ulu öndər Heydər Əliyev sonralar da 1990-cı il 20 Yanvar gecəsi şərəf və ləyaqət zirvəsini fəth edərək əbədiyaşarlıq hüququ qazanan Vətən övladlarını yüksək qiymətləndirərək demişdir: “20 Yanvar şəhidlərinin qəhrəmanlığı Azərbaycan xalqı üçün, Azərbaycan gəncləri üçün örnəkdir.Azərbaycanın bu günkü nəsli də, gələcək nəsilləri də bu şəhidlərinqəhrəmanlığından nümunə götürəcəklər. Azərbaycan xalqının milli azadlığını qorumaq üçün ,müstəqilliyini qorumaq üçün daim mübarizədə olacaqlar. Daim qəhrəmanlıq nümunələri,vətənpərvərlik nümunələri göstərəcəklər. Ona görə də bu şəhidlərin ölməsi bizim üçün nə qədər qəm-qüssə doğursa da nə qədər ağır itkidirsə,o qədər də xalqımız üçün qəhrəmanlıq nümunəsi kimi,örnək kimi bizim milli sərvətimizdir,milli iftixarımızdır. ”
Bu gün 20 Yanvar gecəsi Sovet ordusunun bütün vəhşiliklərinə rəğmən ölümün gözünə dik baxan, Azərbaycanı müstəqilliyə aparan yolda əzmlə irəliləyən vətənimizin şəhid övladları qarşısında qürurla, ehtiramla baş əyirik.
