YAP Suraxanı rayon təşkilatının nümayəndələri neftçi YAP üzvlərini təbrik etmişlər
24 fevral 2022 - ci il tarixdə Yeni Azərbaycan Partiyası Suraxanı rayon təşkilatının sədri Vüqar Seyidov və təşkilatın nümayəndələri Əmircan qəsəbəsi Xanlar Ələkbərov küçəsi ünvanında yerləşən ərazi partiya təşkilatının fəal üzvləri, Suraxani OYL Opereyşn Kompani S.A. şirkətinin neftçi mühəndisləri Heybət Eyvazovun və Mayıl Həsənovun 65 illik yubileyləri münasibəti ilə yubliyarları təbrik etmişlər. Suraxani OYL Opereyşn Kompani S.A. .şirkətinə ziyarət əsnasında bir qrup neftçi YAP üzvləri ilə dəyirmi masa ətrafında görüş keçirilmişdir.
Görüşü giriş sözü ilə açan Əmircan qəsəbəsi Xanlar Ələkbərov küçəsi ünvanında yerləşən ərazi partiya təşkilatının sədri və Suraxani OYL Opereyşn Kompani S.A. şirkətinin icraçı direktoru Arzu Sarıbalayev Yeni Azərbaycan Partiyasında həyata keçirilən son islahatlardan bəhs edərək bildirmişdir ki, doğma partiyanın bütün həyatlarını ictimai fəaliyyətə və dövlətçiliyə həsr etmiş insanlara qarşı ali diqqəti, qayğısı, onların fəaliyyətini yüksək qiymətləndirməsi yeni üzvlərə və gənclərə stimul olmaqdadır.
YAP Suraxanı rayon təşkilatının sədri Vüqar Seyidov çıxış edərək bildirmişdir ki, Heybət Eyvazov və Mayıl Həsənov uzun illərdir ki, öz mənalı ömürlərini müstəqil Azərbaycan dövlətinin iqtisadi çiçəklənməsinə və neft sənayesinin inkişafına həsr etmişlər. Neft sənayesində uğurları ilə yanaşı onların ictimai-siyasi həyatdakı fəaliyyətləri də təqdirəlayiqdir. Xüsusi ilə də Suraxanı rayonunda ictimai fəallıqları danılmazdır. Yeni Azərbaycan Partiyası Suraxanı rayon təşkilatında fəaliyyətləri özlərindən sonra gələn nəsillər üçün vətəndaşlıq nümunəsidir. Onlar ləyaqətli Neftçi, Suraxanı neft mədənlərində mühəndis olmaqla yanaşı, həm də işlədikləri kollektivdə ərazi partiya təşkilatının fəal üzvləri kimi, doğma partiyamıza sədaqətlə xidmət etmiş, bu dövr ərzində ölkədə keçirilən bütün seçkilərdə fəallıqları ilə seçilmişlər. Dövlətimizin və cənab Prezidentimizin neft strategiyasının geniş kütlələr arasında təbliğində aktiv iştirak etmişlər. Vüqar Seyidov onu da xüsusi vurğuladı ki, Gənc neftçi nəslinin, ali təhsilli neftçi mütəxəssislərin siyasi tərbiyəsində, yetişməsində, partiya sıralarına cəlb olunmasında və keçirilən tədbirlərin yüksək səviyyədə təşkilində yubliyarların əməkləri danılmazdır.
Göstərilən diqqətə və qayğıya görə yubliyarlar Heybət Eyvazov və Mayıl Həsənov YAP Suraxanı rayon təşkilatına və onun sədri Vüqar Seyidova öz dərin minnətdarlıqlarını bildirmişlər. Onlar bundan sonra doğma partiyaya ləyaqətlə xidmət etməyə davam edəcəklərini ifadə etmişlər. Sonda ərazi partiya təşkilatının bir qrup üzvü ilə xatirə şəkili çəkdirilmişdir.
