Tükənməz sərvət intellektual potensialdır
Sübhan Şərifli
YAP Suraxanı rayon təşkilatının gənc fəal üzvü
Dövlət Sosial müdafiəsi Fondunun Sosial Tərəfdaş Təcrübə Programının Rəhbəri
Cənab Prezident ölkənin gələcəyini şərtləndirən texnoloji hədəfləri müəyyənləşdirdi. Texnoloji inkişaf əsas prioritet elan edilmişdir. Cənab Prezident vurğuladı ki, süni intellektin inkişafı və onun iqtisadiyyatın bütün sahələrində tətbiqi üçün alimlərin fəal iştirakı zəruridir. Rəqəmsallaşma: Cənab Prezidentin qeyd etdiyi kimi, rəqəmsallaşma işin səmərəsini əhəmiyyətli dərəcədə artırır. "Rəqəmsal İnkişaf və Nəqliyyat Nazirliyi"nin yaradılması dövlətin bu sahəyə verdiyi strateji dəyəri göstərir. Kibertəhlükəsizlik: Cənab Prezident kibertəhlükəsizliyi ciddi təhlükəsizlik məsələsi kimi qeyd etdi və Kibertəhlükəsizlik Mərkəzinin yaradılması qərarını yüksək qiymətləndirdi. Bu gün kibertəhlükəsizlik fiziki təhlükəsizlik qədər vacibdir.
Prezident cənab İlham Əliyev ölkə iqtisadiyyatının müstəqilliyini və dayanıqlığını təmin edən nailiyyətləri təhlil etmişdir. Cənab Prezident açıq şəkildə bəyan etdi ki, bu gün iqtisadiyyatımızın aparıcı qüvvəsi qeyri-neft sektordur. Neft hasilatının obyektiv səbəblərdən azalmasına baxmayaraq, qeyri-neft sektorunda qeydə alınan artım ölkənin islahatlar nəticəsində möhkəm dayandığını sübut edir. Maliyyə Qüdrətimiz isə hər birimizi qürurlandırır. Cənab Prezidentin təqdim etdiyi rəqəmlər Azərbaycanın iqtisadi müstəqilliyini nümayiş etdirir: xarici borc ÜDM-in cəmi 6 faizindən bir qədər çoxdur, valyuta ehtiyatlarımız isə 80 milyard dolları ötüb və xarici borcdan 16 dəfə çoxdur. Cənab Prezidentin vurğuladığı kimi, bu maliyyə gücü sayəsində istənilən böyük layihə, o cümlədən Qarabağ və Şərqi Zəngəzurda həyata keçirilən misilsiz quruculuq işləri heç kimdən asılı olmadan, öz gücümüzlə icra edilir.
Prezident cənab İlham Əliyev Vətən müharibəsində qazanılan Şanlı Zəfərin tarixi və elmi əhəmiyyətini bir daha vurğuladı. Cənab Prezient qeyd etdi ki, "Bizim qədər parlaq, tam və mütləq Qələbə qazanan ikinci ölkə olmamışdır". Bu Qələbə, Azərbaycanın güclü iqtisadiyyatı sayəsində formalaşdırdığı hərbi qüdrətin təntənəsi idi. Vətən müharibəsinin əsas dərsi Pilotsuz Uçuş Aparatlarının (PUA) həlledici roludur. Cənab Prezidentin rəhbərliyi ilə hərbi sənayemiz sürətlə inkişaf edir. Biz artıq öz tələbatımızı ödəməklə yanaşı, hərbi məhsulları ixrac edirik. Cənab Prezidentin çağırışı ilə Azərbaycan alimləri bu prosesə fəal cəlb edilməlidirlər ki, hərbi texnologiyalarımız daim yenilənsin.
Cənab Prezidentin çıxışının əsas tezislərindən bir fikir diqqət mərkəzindədir: "Tükənməz sərvət isə intellektual potensialdır, amma o halda əgər buna sərmayə qoyularsa."Bu, bölgələrdə təhsilin və gənclərin intellektual inkişafına dəstəyin artırılması üçün konkret bir çağırışdır. Prezidentin qeyd etdiyi kimi, bu gün də on minlərlə Azərbaycan gənci dünyanın aparıcı ali məktəblərinə ezam olunur. Bu siyasət, həmçinin Azərbaycanın Birinci vitse-prezidenti Mehriban xanım Əliyevanın rəhbərliyi ilə Heydər Əliyev Fondu vasitəsilə təhsilə və humanitar inkişafa göstərilən dəstəklə tam şəkildə tamamlanır.
Biz gənclər, xüsusi ilə də gələcəyini elmə bağlamış gənclər olaraq ölkə başçısının nitqini yol xəritəsi kimi qəbul etməliyik. İnkişaf elmlə mümkündür və dövlətin dəstəyi ilə bunu bacaracağıq.
