Suraxanı rayonunda Milli Qəhrəman anasının 70 illik yubileyi qeyd edilib
1 aprel Azərbaycanın ən gənc Milli Qəhrəmanı Cavanşir Rəhimovun anası, YAP Suraxanı rayon təşkilatının “Tərəqqi” medallı fəal üzvü, ictimai fəal, Suraxanı rayon sakini Lalə Rəhimovanın 70 illik yubiley tədbiri keçirilib. Tədbirdə Suraxanı Rayon İcra Hakimiyyətinin başçısı Adil Əliyev, YAP Suraxanı rayon təşkilatının sədri Vüqar Seyidov, Milli Məclisin deputatı Qaya Məmmədov, digər rəsmi şəxslər, bir qrup şəhid ailə üzvləri və qazilər iştirak etmişlər.
Tədbir iştirakçıları Suraxanı rayonu Qaraçuxur qəsəbəsi “Neftçilər” parkında Azərbaycanın ən gənc Milli Qəhrəmanı Cavanşir Rəhimovun abidəsini ziyarət edərək gül dəstələri qoymuş, şəhidin ruhuna dualar oxumuşlar.
Suraxanı Rayon İcra Hakimiyyətinin başçısı Adil Əliyev çıxış edərək şəhidlərimizin xatirəsini uca tutaraq demişdir ki, dövlətimiz, rəhbərimiz və xalqımız daim şəhid ailələrinin yanındadır. Onlar hər zaman dövlətimizin qayğı və diqqəti ilə əhatələniblər. RİH-nin başçısı 70 illik yubileyini qeyd edən Lalə Rəhimovanı təbrik edərək ona uzun ömür, cansağlığı arzu edib.
YAP Suraxanı rayon təşkilatının sədri Vüqar Seyidov çıxış edərək dedi ki, Lalə Rəhimova şəhid anası, Milli Qəhrəman anası olmaqla yanaşı uzun illərdir ki, Suraxanı rayonunun ictimai-siyasi həyatında fəal iştirak edir. Yerli təşkilatın sədri onu da vurğuladı ki, Lalə Rəhimova YAP Suraxanı rayon təşkilatı yarandığı ilk günlərdən öz ictimai fəaliyyətini məhz yerli təşkilatın inkişafına həsr etmişdir. Vüqar Seyidov xüsusi olaraq vurğulamışdır ki, Azərbaycan Respublikasının Prezidenti, YAP-ın sədri cənab İlham Əliyev Lalə Rəhimovanın ictimai-siyasi fəallığını yüksək qiymətləndirərək onu “Tərəqqi” medalı ilə təltif etmişdir. YAP Suraxanı rayon təşkilatının sədri Vüqar Seyidov yerli təşkilatın çoxminli üzvləri adından yubliyarı təbrik etmiş, ona qiymətli hədiyyələr təqdim etmişdir.
Milli Məclisin deputatı Qaya Məmmədov da öz növbəsində qeyd etmişdir ki, Lalə Rəhimova Suraxanı rayonu Qaraçuxur qəsəbəsinin fəal və hörmətli sakinlərindəndir. Qaya Məmmədov bildirmişdir ki, Lalə Rəhimova igid övladının əziz xatirəsini yaşadan, onun adını uca tutan, illərdir gənclərə Vətənə məhəbbət hissini aşılayan fədakar anadır.
Tədbir tanınmış mədəniyyət və incəsənət xadimlərinin nümunəvi çıxışları ilə davam etmişdir.
