Şəhid leytenant Elzar Yusubovun xatirəsinə həsr olunmuş karate üzrə turnir keçirilmişdir
28.01.2025-ci ildə Fövqəladə Hallar Nazirliyinin İdman-sağlamlıq klubunun idman arenasında Gənclər və İdman Nazirliyinin dəstəyi və Azərbaycan Karate Federasiyasının təşkilatçılığı ilə Şəhid leytenant Elzar Yusubovun xatirəsinə həsr olunmuş uşaqlar, yeniyetmələr və gənclər arasında karate üzrə turnir keçirilmişdir.
Karate üzrə turnirin açılış mərasimində Milli Məclisin deputatı Sevinc Fətəliyeva, YAP Suraxanı rayon təşkilatının sədri Vüqar Seyidov, Azərbaycan Karate Federasiyasının prezidenti Ülvi Quliyev, Fövqəladə Hallar Nazirliyinin İdman-sağlamlıq klubunun rəisi polkovnik Fizuli Musayev, Suraxanı rayon prokuroru Rəşid Mahmudov, digər rəsmi şəxslər, şəhid ailə üzvləri, qazilər və ictimaiyyət nümayəndələri iştirak etmişlər.
Açılış mərasimində çıxış edən YAP Suraxanı rayon təşkilatının sədri Vüqar Seyidov Şəhid leytenant Elzar Yusubovun əziz xatirəsini bir daha uca tutaraq demişdir ki, gənclər, yeniyetmələr arasında şəhidlərə həsr olunmuş yarışların keçirilməsi həm şəhidlərimizi əbədiyaşar edir, həm də gənclərin asudə vaxtlarının səmərəli keçirilməsinə, onlarda vətənpərvərlik ruhunun formalaşmasına xidmət edir.
Daha sonra Milli Məclisin deputatı Sevinc Fətəliyeva, Azərbaycan Karate Federasiyasının prezidenti Ülvi Quliyev, Fövqəladə Hallar Nazirliyinin İdman-sağlamlıq klubunun rəisi polkovnik Fizuli Musayev, Suraxanı rayon prokuroru Rəşid Mahmudov və digərləri çıxış edərək dedilər ki, zaman ötür, tarixə dönür. Bu illər ərzində bir çox tarixi hadisələr baş verir. Bəziləri müəyyən dövrdən sonra yaddaşlardan silinir, unudulur. Lakin elə tarixi hadisələr də var ki, heç vaxt unudulmur. Qərinələr ötsə də, nəsillər bir-birini əvəz etsə də, öz qanları ilə dastan yazan şəhidlərimiz, torpaq uğrunda canından keçən Elzar kimi oğullarımız heç vaxt unudulmurlar. Ən ali, müqəddəs və şərəfli olan şəhidlik zirvəsinə yüksələnlər daim qəlblərdə yaşayırlar.
Şəhid leytenant Elzar Yusubovun anası Günəş Yusubova çıxış edərək şəhid ailələrinə göstərilən diqqət və qayğıya görə Prezident cənab İlham Əliyevə, Birinci vitse-prezident Mehriban xanım Əliyevaya və Yeni Azərbaycan Partiyasına öz dərin minnətdarlığını bildirmişdir.
