Qoy Bayrağımız ölkəmizin hər guşəsində və beynəlxalq aləmdə daim ucalarda dalğalansın
Gülşən Yusubova
YAP Suraxanı rayon təşkilatının ƏPT-nin sədri
Suraxanı rayonu, 30 saylı ambulatoriyanın baş həkimi
9 Noyabr – Dövlət Bayrağı Günü Azərbaycan xalqının öz tarixinə, müstəqilliyinə və milli dəyərlərinə bağlılığını ifadə edən əlamətdar gündür. Üçrəngli bayrağımız nəsilləri birləşdirən ortaq mənəvi dəyər, dövlətimizin suverenliyinin və xalqımızın gələcəyə inamının parlaq nişanəsidir.
Azərbaycan Xalq Cümhuriyyətinin 1918-ci il noyabrın 9-da qəbul etdiyi bayraq xalqımızın azad dövlət qurmaq iradəsini əks etdirmişdir. Onun yenidən rəsmi status qazanması yolunda mühüm mərhələ Ümummilli Lider Heydər Əliyevin təşəbbüsü ilə 1990-cı il noyabrın 17-də Naxçıvanda atılmışdır. 1991-ci il fevralın 5-də üçrəngli bayrağın Azərbaycan Respublikasının Dövlət Bayrağı kimi qəbul edilməsi tarixi davamlılığın təntənəsi olmuşdur.
Bayrağımızın mavi, qırmızı və yaşıl zolaqları, ağ aypara və səkkizguşəli ulduzu milli kimliyimizi, mənəvi irsimizi və tərəqqiyə yönəlmiş arzularımızı təcəssüm etdirir. Ona hörmət yalnız rəsmi mərasimlərlə məhdudlaşmır: bu, hər bir vətəndaşın gündəlik davranışında, vətənə münasibətində və gənc nəslin tərbiyəsində yaşamalıdır. Dövlət Bayrağının istifadəsini tənzimləyən qaydalar və “Azərbaycan Bayrağı” ordeni də bu rəmzə verilən yüksək dəyərin ifadəsidir.
Prezident İlham Əliyevin rəhbərliyi dövründə Azərbaycanın beynəlxalq nüfuzunun möhkəmlənməsi, Bakıda Dövlət Bayrağı Meydanının yaradılması və xüsusilə 2020-ci ildə qazanılan Zəfər bayrağımıza yeni tarixi məna qazandırmışdır. Dövlət suverenliyimizin tam bərpasından sonra üçrəngli bayrağımızın azad edilmiş torpaqlarımızda, o cümlədən Şuşada və Xankəndidə dalğalanması xalqımızın uzun illər yaşatdığı arzuların gerçəkləşməsidir.
Birinci vitse-prezident, birinci xanım Mehriban Əliyevanın milli-mədəni irsimizin qorunmasına, mənəvi dəyərlərimizin təbliğinə və Azərbaycanın dünyada tanıdılmasına yönəlmiş fəaliyyəti də dövlətçilik düşüncəsinin və vətənpərvərlik ruhunun möhkəmlənməsinə xidmət edir.
Bu gün bayrağımıza baxarkən yalnız keçmişimizin şərəfli səhifələrini deyil, həm də şəhidlərimizin xatirəsini, qazilərimizin fədakarlığını, xalqımızın birliyini və qarşıdakı böyük hədəfləri görürük. Azərbaycançılıq məfkurəsi ətrafında birləşən xalqımız üçün üçrəngli bayraq həm qürur, həm məsuliyyət, həm də gələcək nəsillərə ötürüləcək müqəddəs əmanətdir.
