Prezident İlham Əliyevin Davosda “Euronews” televiziyasına müsahibəsi – Azərbaycanın qlobal mövqeyi və strateji baxışı
Qasım Qasımov
2026-cı il yanvarın 20-də İsveçrənin Davos şəhərində keçirilən beynəlxalq tədbirlər çərçivəsində Azərbaycan Respublikasının Prezidenti İlham Əliyev Euronews televiziya kanalına geniş müsahibə verib. Müsahibə zamanı qlobal siyasi proseslər, beynəlxalq hüququn mövcud durumu, regional təhlükəsizlik və enerji siyasəti ilə bağlı mühüm mesajlar səsləndirilib.
Prezident İlham Əliyev müasir beynəlxalq münasibətlər sistemində müşahidə olunan ziddiyyətlərə diqqət çəkərək bildirib ki, beynəlxalq hüquq normaları artıq dünya ictimaiyyətinin bütün üzvləri üçün mütləq prinsip kimi qəbul edilmir. Dövlət başçısı qeyd edib ki, bu normaların selektiv tətbiqi qlobal etimad mühitinə mənfi təsir göstərir və beynəlxalq münasibətlərdə ikili standartları dərinləşdirir. Azərbaycan isə beynəlxalq hüquqa əsaslanan ədalətli və bərabər yanaşmanın tərəfdarı olaraq qalır.
Müsahibə zamanı humanist dəyərlər mövzusuna da toxunan Prezident İlham Əliyev “Zayed İnsan Qardaşlığı Mükafatı” kimi nüfuzlu beynəlxalq mükafata layiq görülməsini böyük şərəf kimi dəyərləndirib. Dövlət başçısı bu mükafatı Azərbaycanın multikulturalizm, tolerantlıq və sivilizasiyalararası dialoqu təşviq edən siyasətinin beynəlxalq səviyyədə yüksək qiymətləndirilməsi kimi xarakterizə edib.
Prezident ölkə daxilindəki vəziyyətə dair danışaraq vurğulayıb ki, Azərbaycanda daxili sabitlik möhkəmdir və potensial risklər mövcud deyil. Həyata keçirilən ardıcıl islahatlar ölkənin dayanıqlı inkişafını, sosial rifahın yüksəlməsini və milli təhlükəsizliyin etibarlı təminatını şərtləndirir.
Enerji məsələlərinə xüsusi diqqət ayıran dövlət başçısı bildirib ki, Azərbaycan Cənubi Qafqazda enerji ehtiyatlarına malik olan və bu ehtiyatları neft və qaz şəklində digər ölkələrə ixrac edən yeganə dövlətdir. Bu, Azərbaycanın regional və qlobal enerji təhlükəsizliyində mühüm rolunu bir daha təsdiqləyir və ölkəmizin etibarlı tərəfdaş kimi mövqeyini gücləndirir.
Prezident İlham Əliyev müsahibədə Avropa Parlamentinin Azərbaycana qarşı daimi tənqidlərinə də münasibət bildirib. O qeyd edib ki, Avropa Parlamentinin qərəzli və obyektivlikdən uzaq yanaşmalarına Azərbaycan artıq reaksiya vermir, çünki bu mövqelər ikili standartlara əsaslanır və real vəziyyəti əks etdirmir.
Davosda “Euronews” televiziyasına verilən bu müsahibə bir daha nümayiş etdirdi ki, Azərbaycan qlobal proseslərdə fəal iştirak edən, müstəqil mövqeyi və aydın strateji baxışı olan dövlətdir.
