Müsahibədə Naxçıvanın enerji təhlükəsizliyi məsələsinə xüsusi diqqət yetirilib
Azərbaycan Respublikasının Prezidenti İlham Əliyev 11 avqust 2026-cı il tarixində Naxçıvan Muxtar Respublikasına səfəri çərçivəsində Azərbaycan Televiziyasına müsahibə verib. Müsahibə zamanı dövlət başçısı səfərin nəticələri, Naxçıvanın sosial-iqtisadi inkişafı, müdafiə və enerji təhlükəsizliyi, nəqliyyat infrastrukturu, sənaye və kənd təsərrüfatının inkişafı, eləcə də Zəngəzur dəhlizi ilə bağlı məsələlər barədə geniş fikir bildirib.
Prezident İlham Əliyev Naxçıvanın müdafiə potensialının gücləndirilməsinin daim diqqət mərkəzində saxlanıldığını qeyd edib. Eyni zamanda, Naxçıvan Sənaye Parkının yaradılmasının regionda yeni iş yerlərinin açılmasına və sənaye potensialının artırılmasına mühüm töhfə verəcəyini vurğulayıb.
Müsahibədə Naxçıvanın enerji təhlükəsizliyi məsələsinə də xüsusi diqqət yetirilib. Dövlət başçısı 300 meqavat gücündə istilik elektrik stansiyasının və Günəş elektrik stansiyalarının yaradılmasının Naxçıvanın dayanıqlı enerji təminatına, gələcəkdə isə elektrik enerjisinin ixrac imkanlarının genişləndirilməsinə xidmət edəcəyini bildirib. Naxçıvanda qazlaşmanın 100 faiz təşkil etdiyi də qeyd olunub.
Prezident İlham Əliyev Zəngəzur dəhlizinin yaradılmasının Azərbaycanın əsas hissəsi ilə Naxçıvan arasında əlaqələrin gücləndirilməsi baxımından mühüm əhəmiyyət daşıdığını bildirib. Dəhlizin regionda nəqliyyat, iqtisadi və enerji əlaqələrinin genişlənməsinə yeni imkanlar yaradacağı vurğulanıb.
Müsahibə zamanı Naxçıvanın yol-nəqliyyat infrastrukturunun inkişafı, rayonlararası nəqliyyatın yaxşılaşdırılması, kənd yollarının yenilənməsi, suvarma sistemlərinin təkmilləşdirilməsi, kənd təsərrüfatının və turizmin inkişafı ilə bağlı qarşıda duran vəzifələrdən də bəhs edilib. Naxçıvan şəhərinin Baş planının hazırlanması və müasir şəhər infrastrukturunun formalaşdırılması istiqamətində işlərin davam etdiriləcəyi bildirilib.
Dövlət başçısı Naxçıvanın Qarabağ və Şərqi Zəngəzurla vahid inkişaf konsepsiyası əsasında inkişaf etdirilməsinin nəzərdə tutulduğunu diqqətə çatdırıb. Bu çərçivədə idarəetmə sisteminin təkmilləşdirilməsi, sosial-iqtisadi inkişafın sürətləndirilməsi və əhalinin yaşayış şəraitinin daha da yaxşılaşdırılmasının əsas hədəflərdən olduğu qeyd edilib.
Ümumilikdə, Prezident İlham Əliyevin Azərbaycan Televiziyasına müsahibəsində Naxçıvan Muxtar Respublikasının təhlükəsizliyinin, iqtisadi və sosial inkişafının, enerji potensialının və nəqliyyat imkanlarının genişləndirilməsi ilə bağlı həyata keçirilən və qarşıdakı dövr üçün nəzərdə tutulan tədbirlər barədə mühüm fikirlər səsləndirilib.
