Müasir Azərbaycan cəmiyyətində gənclər yalnız gələcəyin deyil, bu günün də aktiv iştirakçılarıdır.
Musa Rzayev
Azərbaycan Respublikasında gənclərə göstərilən yüksək diqqət və qayğı dövlət siyasətinin əsas prioritetlərindən biri kimi formalaşmışdır. 2 Fevral – Azərbaycan Gəncləri Günü bu siyasətin rəmzi ifadəsi olmaqla, gənclərin ölkənin ictimai, siyasi və mədəni həyatındakı rolunun rəsmi şəkildə tanınmasını ifadə edir.
Ümummilli Lider Heydər Əliyevin əsasını qoyduğu Dövlət Gənclər Siyasəti müstəqil Azərbaycanın inkişaf yolunda strateji əhəmiyyət daşıyır. Bu siyasətin əsas məqsədi gənclərin hərtərəfli inkişafını təmin etmək, onları milli-mənəvi dəyərlərə bağlı, eyni zamanda müasir dünyagörüşə malik vətəndaşlar kimi formalaşdırmaqdır. Bu gün Prezident İlham Əliyevin rəhbərliyi ilə gənclər siyasəti yeni mərhələyə qədəm qoymuş, müasir çağırışlara uyğun şəkildə inkişaf etdirilmişdir.
Azərbaycanda gənclərlə bağlı siyasətin formalaşması müstəqilliyin ilk illərindən etibarən dövlət quruculuğunun əsas istiqamətlərindən biri olmuşdur. Gənclərin problemlərinin kompleks şəkildə həlli, onların sosial müdafiəsinin gücləndirilməsi və cəmiyyətə inteqrasiyasının təmin edilməsi məqsədilə mühüm institusional addımlar atılmışdır. Bu baxımdan Gənclər və İdman Nazirliyinin yaradılması gənclərlə iş sahəsində vahid dövlət mexanizminin formalaşmasına şərait yaratmışdır.
Dövlət tərəfindən qəbul edilən qanunlar, proqramlar və strateji sənədlər gənclər siyasətinin sistemli xarakter daşımasını təmin edir. Gənclərin təhsil, məşğulluq, sağlam həyat tərzi, mədəni inkişaf və sosial fəallıq sahələrində dəstəklənməsi bu siyasətin əsas istiqamətlərini təşkil edir. Xüsusilə istedadlı gənclərin üzə çıxarılması və onların inkişafına şərait yaradılması dövlət gənclər siyasətinin prioritet məqsədlərindən biridir.
Müasir Azərbaycan cəmiyyətində gənclər yalnız gələcəyin deyil, bu günün də aktiv iştirakçılarıdır. Onların ictimai təşəbbüslərdə, sosial layihələrdə və könüllülük fəaliyyətlərində iştirakı vətəndaş cəmiyyətinin inkişafına mühüm töhfə verir. Gənclərin sosial məsuliyyət hissinin formalaşması, liderlik bacarıqlarının inkişafı və təşəbbüskarlığının artırılması dövlət tərəfindən həyata keçirilən proqramların əsas nəticələrindəndir.
Paytaxt Bakı ilə yanaşı, regionlarda fəaliyyət göstərən gənclər mərkəzləri və gənclər evləri gənclərin sosiallaşması və asudə vaxtlarının səmərəli təşkili baxımından mühüm rol oynayır. Bu mərkəzlər gənclərin intellektual və yaradıcı potensialının reallaşdırılmasına, eyni zamanda onların vətənpərvərlik ruhunda formalaşmasına xidmət edir.
Vətənpərvərlik Azərbaycan gənclər siyasətinin əsas ideoloji sütunlarından biridir. Gənclərin milli dəyərlərə, dövlətçilik ənənələrinə və müstəqillik ideallarına sadiqlik ruhunda tərbiyə olunması uzunmüddətli sabitliyin əsas şərtlərindən hesab olunur. Xüsusilə Vətən müharibəsi dövründə Azərbaycan gəncliyinin nümayiş etdirdiyi birlik, fədakarlıq və məsuliyyət hissi gənclər siyasətinin real nəticələrini açıq şəkildə ortaya qoymuşdur.
Bununla yanaşı, müasir dövrdə informasiya təhlükəsizliyi və informasiya müharibəsi məsələləri də gənclərin üzərinə yeni vəzifələr qoyur. Rəqəmsal mühitdə fəal olan Azərbaycan gəncləri ölkənin milli maraqlarının qorunmasında mühüm rol oynayır, beynəlxalq ictimai rəyin formalaşmasına təsir göstərirlər.
Dördüncü Sənaye İnqilabı dövründə gənclərin bilik və bacarıqlarının daim yenilənməsi zərurətə çevrilmişdir. Rəqəmsal savadlılıq, innovativ düşüncə, texnoloji bacarıqlar və tənqidi yanaşma müasir əmək bazarının əsas tələbləridir. Bu baxımdan gənclərin təhsili və peşə hazırlığı sahəsində həyata keçirilən islahatlar xüsusi əhəmiyyət kəsb edir.
Gənclərin beynəlxalq təhsil proqramlarında iştirakı, xaricdə təhsil imkanlarının genişləndirilməsi və beynəlxalq layihələrə cəlb olunması onların qlobal rəqabət qabiliyyətini artırır. Eyni zamanda könüllülük hərəkatının genişlənməsi gənclərin sosial fəallığını və ictimai məsuliyyətini gücləndirən mühüm amillərdəndir.
2 Fevral – Azərbaycan Gəncləri Günü Azərbaycan dövlətinin gənclərə verdiyi strateji əhəmiyyətin təzahürüdür. Gənclərin bilikli, fəal, təşəbbüskar və milli dəyərlərə sadiq şəkildə formalaşması ölkənin davamlı inkişafının əsas təminatçısıdır. Dövlət və gənclər arasında formalaşan qarşılıqlı etimad münasibətləri Azərbaycanın gələcək uğurlarının möhkəm təməlini təşkil edir.
