Azərbaycanın hər bir uğurunda YAP-ın öz payı, öz rolu vardır
Noyabrın 21-də milli siyasi iradəni təmsil edən Yeni Azərbaycan Partiyasının (YAP) yaranmasından 32 il ötür. 90-cı illər Azərbaycan xalqının ən ağır günlərini yaşadığı bir dövrdə bir çox ziyalılar xalqımızı bu bataqlıqdan çıxartmaq məqsədi ilə siyasi təşkilatın yaradılmasını təklif etdilər. Bütün bu xahişləri nəzərə alaraq, Ulu Öndər Heydər Əliyevin 1992-ci il 21 noyabr tarixində keçirilmiş konfransda müstəqil Azərbaycan tarixində öz üzərində böyük tarixi missiya götürən və xalqımızın həyatında mühüm hadisəyə çevrilən Yeni Azərbaycan Partiyasıının əsasını qoydu.
Azərbaycan Partiyasının Azərbaycan xalqı və dövlətinin həyatında olduqca böyük rolu var: “Partiyanın yaradılmasında məqsəd bundan ibarət idi ki, tarixi sınaqlar qarşısında qalmış Azərbaycanı inkişaf yoluna qoysunlar. Azərbaycan xalqının ümummilli lideri Heydər Əliyevin ətrafında birləşərək müstəqilliyimizin, suverenliyimizin qorunması, ölkənin gələcək inkişaf yolunun müəyyən olunması naminə fəaliyyət göstərmək istəyən insanlar məhz YAP çərçivəsində birləşərək atdıqları addımlar sayəsində ölkənin xilas missiyasını yerinə yetirdilər.
Azərbaycanda daxili sabitlik təmin olundu, həmrəylik yarandı, ölkəmizin inkişaf strategiyası formalaşdı və Ulu Öndərin rəhbərliyi altında YAP 1993-cü il oktyabrın 3-də prezident seçkilərində iqtidar partiyasına çevrildi. Bundan sonra Azərbaycanın davamlı, fasiləsiz inkişafı müşahidə olundu.
Yeni Azərbaycan Partiyası xalqın partiyasıdır. YAP yarandığı gündən ümumxalq partiyası kimi nüfuz qazanmışdır. Sözlə əməl birliyi partiyanın nüfuzunun artmasında əhəmiyyətli rol oynayır. Yeni Azərbaycan Partiyasının sıralarına bu gün yüz minlərlə insanın birləşməsini hələ sağlığında canlı əfsanəyə çevrilmiş Ulu öndərin və bu gün onun siyasi xəttini uğurla davam etdirən Prezident İlham Əliyevin xalqa göstərdiyi misilsiz xidmətin nəticəsi kimi dəyərləndirilir.
Yeni Azərbaycan Partiyasının 11 strateji hədəfi var: “Ulu Öndər Heydər Əliyev irsinin təbliği və təşviqi”, “Güclü iqtisadiyyat və davamlı inkişaf”, “İnklüziv cəmiyyət, ədalətli sosial təminat və insan kapitalının inkişafı”, “Şəffaflığın artırılması”, “Vətəndaş cəmiyyətinin inkişafı”, “Azərbaycan dili və dünya azərbaycanlılarının həmrəyliyi”, “Mədəni irsin və milli-mənəvi dəyərlərin qorunması”, “Vətəndaş həmrəyliyinin təminatı”, “Milli maraqlar və xarici siyasət”, “Ordu quruculuğu” və “İşğaldan azad olunmuş ərazilərə Böyük Qayıdış. Yeni Azərbaycan Partiyasının strateji hədəfləri milli maraqlarımıza xidmət edir. Partiya öz fəaliyyətini bu hədəflər üzərində qurub və məqsədə çatmaq üçün çox böyük layihələr icra edir.
Azərbaycanın hər bir uğurunda YAP-ın öz payı, öz rolu vardır. Bu reallıq daim önə çəkilir ki, partiyanın ilk Proqramı tarixi Zəfərimizə qədərki dövrün reallıqlarına uyğun hədəfləri özündə əks etdirdi. Əsas hədəf “Yeni Azərbaycan uğrunda” oldu. 2020-ci ildə tarixi Zəfərimiz bütün sahələrdə yeniliklərə, təkmilləşməyə yol açdı. Ali Baş Komandanımız, Prezident İlham Əliyevin rəhbərliyi ilə aparılan “Dəmir yumruq” əməliyyatı nəticəsində 30 il işğal altında qalan torpaqlarımız azadlığa qovuşdu, ərazi bütövlüyümüz bərpa olundu. Qarşıda isə bizi daha böyük hədəflər, məqsədlər gözləyir.
