YAP Suraxanı rayon təşkilatının yeni ərazi partiya təşkilatı (əpt) yaradıldı
Yeni Azərbaycan Partiyası Suraxanı rayon təşkilatının konfrans zalında yerli təşkilatının sədri Vüqar Seyidovun, təşkilatın aparatının əməkdaşlarının Azərbaycan Avtomobil Yolları Dövlət Agentliyinin Bakı 7 nömrəli Yol İstismarı MMC-nin YAP üzvləri, partiya fəalları və yeni qəbul olunmaq üçün müraciət edən əməkdaşları ilə görüşü keçirilmişdir. YAP Suraxanı rayon təşkilatının sədri Vüqar Seyidov görüşü giriş sözü ilə açıq elan edərək bildirmişdir ki, idarədə çalışan çoxsaylı YAP üzvlərinin öz ərizələri ilə müraciətinə əsasən təmsil olunduqları qurumda YAP Suraxanı rayon təşkilatının Zığ qəsəbəsi Zığ – Hava Limanı yolu ünvanında yerləşən ərazi partiya təşkilatının yaradılması ilə bağlı müvafiq əmr imzalanmışdır. Daha sonra yerli təşkilatın sədri bildirdi ki, Azərbaycanın yol infrastrukturunun dəyişdirilməsinə, yollarımızın formalaşdırılmasına və inkişafına Ümummilli Lider Heydər Əliyev tərəfindən başlanılmışdır. Ulu Öndər yolu təkcə mədəniyyət və iqtisadiyyat faktoru deyil, həm də bütünlüklə həyat mənbəyi hesab etmişdir.
Ümummilli Lider Heydər Əliyevin uğurlu inkişaf strategiyasını layiqincə davam etdirən cənab İlham Əliyev də bütün sahələrlə yanaşı, Azərbaycanda beynəlxalq standartlara cavab verən yolların tikintisini prioritet məsələ kimi daim gündəmdə saxlayır. İndi istər paytaxt Bakıda, istərsə də bölgələrdə uzanan müasir yollar ümumilikdə ölkə əhalisinin təhlükəsizliyini və rahatlığını təmin edir, məhsulun itkisiz daşınmasına şərait yaradır və regionların sosial-iqtisadi inkişafına kömək edir. Prezident cənab İlham Əliyevin uzaqgörən siyasəti nəticəsində əldə olunan uğurların qorunub saxlanması üçün yorulmadan fəaliyyət göstərməyin əhəmiyyətinə toxunan Vüqar Seyidov xüsusi qeyd etdi ki, hər bir vətəndaş öz fəaliyyət sahəsindən başqa ictimai fəaliyyətlə də məşğul olmalı, ölkənin gələcəyi haqqında düşünməlidir. Yerli təşkilatın sədri təşkilati məsələlərə toxunaraq dedi ki, bugünkü iclasın gündəliyində iki məsələ - ƏPT-nin sədrinin və sədr müavininin seçilməsi məsələsi nəzərdə tutulmuşdur.
Sədr vəzifəsinə Müşfiq İmanovun namizədliyi irəli sürüldü və bu təklifə səsvermə ilə münasibət bildirilməsi xahiş edildi. ƏPT-də təmsil olunan üzvlərin səsverməsi nəticəsində Müşfiq İmranov sədr seçilmişdir. Səsvermə nəticəsində seçilmiş yeni sədr YAP sıralarında təcrübəsi və səmərəli fəaliyyəti ilə seçilən Bəxtiyar Abdullayevin ƏPT-nin sədr müavini kimi namizədliyini irəli sürdü. ƏPT-də təmsil olunan üzvlərin səsverməsi nəticəsində Bəxtiyar Abdullayev ƏPT-nin sədr müavini seçilmişdir.
Sonda Yeni Azərbaycan Partiyası Suraxanı rayon təşkilatının sədri Vüqar Seyidov Zığ qəsəbəsi Zığ – Hava Limanı yolu ünvanında yerləşən ərazi partiya təşkilatının üzvlərini ƏPT-nin yaradılması münasibəti ilə bir daha təbrik etmiş, bütün üzvlərə ictimai fəaliyyətlərində uğurlar arzulamışdır.
