YAP Suraxanı rayon təşkilatının nümayəndələri Əməkdar İncəsənət Xadimi pianoçu Gülarə Əliyevanın xatirə gecəsində iştirak etmişlər

02 noyabr 2021-ci il tarixdə Suraxanı Rayon İcra Hakimiyyətinin başçısı Əziz Əzizov, Yeni Azərbaycan Partiyası Suraxanı rayon təşkilatının sədri Vüqar Seyidov, Bakı şəhər Mədəniyyət Baş İdarəsinin rəisi Cəlil Məlikov, respublikanın incəsənət xadimləri, mərhum Gülarə Əliyevanın ailə üzvləri və digər rəsmi şəxslər YAP Suraxanı rayon təşkilatının Bülbülə qəsəbəsi Səttar Bəhlulzadə küçəsi 62 ünvanında yerləşən ərazi partiya təşkilatının təşkil etdiyi Azərbaycan SSR-nin əməkdar incəsənət xadimi, sənətşünaslıq üzrə elmləri namizədi, pianoçu Gülarə Əliyevanın xatirə gecəsində iştirak etmişlər. Bakı şəhəri Gülarə Əliyeva adına 3 nömrəli Uşaq İncəsənət Məktəbinin müəllim kollektvinin və şagirdlərinin ifasında “Dan Ulduzu” ansamblının bir zamanlar məşhur olan mahnıları səsləndirilmişdir. Konsert proqramında tanınmış pianoçu Gülarə Əliyeva ilə çiyin-çiyinə çalışmış, onun yetirmələri olmuş, incəsənət xadimləri  öz xatirələrini tamaşaçılarla bölüşmüşlər.

Tədbirdə çıxış edən YAP Suraxanı rayon təşkilatının sədri Vüqar Seyidov Azərbaycan mədəniyyətinə göstərilən dövlət qayğısından bəhs edərək bildirmişdir ki, mərhum Dilarə Əliyevanın adını daşıyan Bakı şəhəri 3 nömrəli Uşaq İncəsənət Məktəbi cənab Prezident İlham Əliyev və çox hörmətli Mehriban xanım Əliyevanın iştirakı ilə açılıb, gənclərin ixtiyarına verilmişdir. Vüqar Seyidov diqqətə çatdırdı ki, bütün mənalı ömrünü müsiqiyə həsr edən mərhum Gülarə xanım bir zamanlar “Dan Ulduzu” ansamblını çox böyük çətinliklər bahasına yaratmış və yaşatmışdır. Konsert proqramından mənəvi qida aldığını xüsusi vurğulayan Vüqar Seyidov mahnıları dinlədikcə keçmişə xəyali səyahət etdiyini və təşkil olunmuş konsertdən böyük zövq aldığını xüsusi qeyd etmişdir. Gülarə xanım Əliyevanın əziz ruhuna öz dərin ehtiramını bildirən yerli təşkilatın sədri onun kübar, zərif və çox savadlı bir xanım olduğunu bildirmişdir. YAP rəsmisi onu da xüsusi qeyd etmişdir ki, Əziz Əliyev kimi dahi bir dövlət adamının, ictimai-siyasi xadimin ailəsində, evində böyümüş, ondan tərbiyə almış bir insanın belə nümunəvi insani keyfiyyətlərə malik olması çox təbii haldır.

Çıxış edən digər natiqlər də təşkil olunmuş xatirə gecəsini yüksək qiymətləndirmişlər. Sonda məktəb kollektivi, şagirdlər və qonaqlar xatirə şəkili çəkdirmişlər.