YAP Suraxanı rayon təşkilatında şahmat üzrə turnirin mükafatlandırma mərasimi keçirilib

YAP Suraxanı rayon təşkilatı və Chess Masrer Şahmat Klubunun birgə təqdimatında Azərbaycan Respublikasının Prezidenti cənab İlham Əliyevin prezident seçilməsinin 20 illiyinə həsr olunmuş uşaq və yeniyetmələr arasında şahmat üzrə turnir keçirilib. Azərbaycanın Milli Qəhrəmanı Albert Aqarunov adına 154 nömrəli tam orta məktəbdə təşkil olunmuş şahmat turnirinin qaliblərinin mükafatlandırma mərasimi YAP Suraxanı rayon təşkilatının inzibati binasında keçirilmişdir. Turnirin mükafatlandırma mərasimini giriş sözü ilə açan yerli təşkilatın sədri Vüqar Seyidov məktəbliləri salamlayaraq bildirmişdir ki, son iki yüz ildə itirilmiş torpaqlarımız ilk dəfə geriyə qaytarılır. Xankəndində Azərbaycan bayrağı dalğalanır. Milli maraqlarımız və milli birliyimiz yenidən təmin olunur. Gənc nəslin tərbiyəsində milli vətənpərvər siyasət ön plana çəkilir və bunun nəticəsində Qarabağı, Şərqi Zəngəzuru heç vaxt o torpaqları görməyən gənclər azad edirlər. Vüqar Seyidov gənc nəslin yetişməsində məktəblərin rolunu xüsusi vurğulayaraq dedi ki, gələcək nəsillərin təlim-tərbiyəsi ilə daha da ciddi məşğul olmaq lazımdır.

Şahmat turnirinin baş hakimi Səidə Vəzirova turnir haqqında geniş məlumat verdikdən sonra qaliblər diplom və medallarla təltif olundular. Sonda xatirə şəkili çəkdirildi.