"Qisası alınmış Xocalı" adlı tədbir keçirilmişdir

25 fevral 2025-ci il tarixdə YAP Suraxanı rayon təşkilatı və “3 nömrəli Uşaq - Gənclər İnkişaf Mərkəzi” Publik Hüquqi Şəxsinin birgə təşkilatçılığı ilə Xocalı soyqırımının 33-cü ildönümünə həsr olunmuş "Qisası alınmış Xocalı" adlı tədbir keçirilmişdir.

Tədbirdə YAP Suraxanı rayon təşkilatının sədr müavini Salman Əbdülov, "3 nömrəli Uşaq-Gənclər İnkişaf Mərkəzi" PHŞ-in direktoru Lalə Qəti, Suraxanı rayonu Heydər Əliyev Mərkəzinin əməkdaşı Aynur Novruzova iştirak etmişlər.

Tədbirdə Azərbaycan Respublikasının Dövlət Himni səsləndirilmiş, Ümumilli Lider Heydər Əliyevin və respublikamızın ərazi bütövlüyü uğrunda həlak olan şəhidlərimizin və Xocalı faciəsi qurbanlarının əziz xatirəsi bir dəqiqəlik sükutla yad edilmişdir. Daha sonra mərkəzin dərnək üzvləri vətənpərvərlik mövzusunda yazılmış şeirlər, səhnəciklər və mahnılarla çıxış etmiş, videoçarxlara tamaşa olunmuşdur.

YAP Suraxanı rayon təşkilatının sədr müavini Salman Əbdülov və "3 nömrəli Uşaq-Gənclər İnkişaf Mərkəzi" PHŞ-in direktoru Lalə Qəti çıxış edərək 1992-ci il fevralın 25-dən 26-na keçən gecə erməni cəlladlarının dinc vətəndaşlara qarşı törətdiyi soyqırımın tarixindən danışaraq bu faciənin Azərbaycan xalqının yaddaşına qanlı hərflərlə yazıldığını, məhz Ulu Öndər Heydər Əliyevin Azərbaycanda ikinci dəfə siyasi hakimiyyətə gəlişindən sonra Xocalı soyqırımına hüquqi qiymət verildiyini, 2023-cü ilin 15 oktyabr tarixində Prezident İlham Əliyev tərəfindən Xocalı şəhərində qaldırılan Azərbaycanın dövlət bayrağının dalğalanmasının Xocalı faciəsi qurbanlarının qanının yerdə qalmadığını bir daha nümayiş etdirdiyini, Azərbaycanın Vətən müharibəsindəki qələbəsindən sonra işğaldan azad edilmiş ərazilərdə aparılan quruculuq işlərini, ötən ildən başlayaraq Xocalı sakinlərinin mərhələli şəkildə öz doğma yurd-yuvalarına köç etdiyini vurğulamış, artıq Xocalı soyqırımının ildönümlərinin xalqımız tərəfindən nikbin ovqatda qeyd edildiyini diqqətə çatdırmışlar.