Prezidentin Qazaxıstana səfəri: Azərbaycan–Qazaxıstan strateji əməkdaşlığının yeni mərhələsi
Həsrət Cəfərova
YAP Suraxanı rayon təşkilatının üzvü
Suraxanı rayon, 146 nömrəli tam orta məktəbin müəllimi
Azərbaycan və Qazaxıstanı çoxəsrlik tarix, mədəni və mənəvi köklər birləşdirir. Türkdilli xalqlar ailəsinin iki əsas üzvü kimi, bu dövlətlər arasında münasibətlər qarşılıqlı hörmət, bərabərlik və strateji maraqlar üzərində qurulmuşdur. Prezident İlham Əliyev və Prezident Kasım-Jomart Tokayevin qarşılıqlı səfərləri nəticəsində bu əlaqələr strateji tərəfdaşlıqdan müttəfiqlik səviyyəsinə yüksəlib.
Səfər çərçivəsində imzalanan çoxsaylı sənədlər enerji, nəqliyyat, ticarət, mədəniyyət, informasiya texnologiyaları və təhsil sahələrini əhatə edərək iki ölkənin uzunmüddətli əməkdaşlığını daha da dərinləşdirir. Bu sənədlər, həmçinin bölgələrarası iqtisadi inteqrasiyanın genişlənməsi və Avrasiya məkanında sabitlik və inkişafın təmin edilməsinə xidmət edir.
Prezident İlham Əliyevin bəyanatında vurğulandığı kimi, Avrasiya məkanında həyata keçirilən irimiqyaslı layihələr Cənubi Qafqaz və Mərkəzi Asiya regionlarını vahid geoiqtisadi məkana çevirir. Bu kontekstdə Zəngəzur dəhlizi layihəsi xüsusi strateji əhəmiyyət kəsb edir.
Zəngəzur dəhlizi yalnız Azərbaycan və Qazaxıstan üçün deyil, bütövlükdə Türk Dövlətləri Təşkilatına (TDT) üzv ölkələr üçün də birbaşa nəqliyyat bağlantısı və iqtisadi inkişaf arteriyası kimi çıxış edir. Bu dəhliz Orta Dəhliz (Transxəzər Beynəlxalq Nəqliyyat Marşrutu) ilə inteqrasiya olunaraq Avropa və Asiya arasında yeni, daha səmərəli ticarət xətti yaradır.
Prezident İlham Əliyev çıxışında Qazaxıstanın son illərdəki iqtisadi yüksəlişini və beynəlxalq arenadakı nüfuzunun artmasını xüsusi vurğuladı. Qazaxıstan regional və qlobal məsələlərdə etibarlı tərəfdaş kimi formalaşır, beynəlxalq təşkilatlarda fəal mövqe nümayiş etdirir. Azərbaycan isə bu istiqamətdə daim Qazaxıstanın təşəbbüslərini dəstəkləyir, qarşılıqlı olaraq Qazaxıstan da Azərbaycanın milli maraqlarına uyğun məsələlərdə həmrəylik nümayiş etdirir.
Azərbaycan ilə Ermənistan arasında sülh prosesinin irəliləməsi regionda sabitliyin əsas şərtidir. Prezident İlham Əliyevin bəyanatında bu prosesin müxtəlif tərəfdaş dövlətlərin, o cümlədən Qazaxıstanın konstruktiv dəstəyi ilə davam etdirilməsinin önəmi vurğulanıb.
Eyni zamanda, Qazaxıstan Qarabağın bərpası və yenidən qurulması istiqamətində konkret yardım addımları atıb. Bu həm qardaşlıq münasibətlərinin, həm də Türk dünyası daxilində real həmrəyliyin nümunəsidir. Qazaxıstanın mədəni və humanitar sahədə həyata keçirdiyi təşəbbüslər Qarabağın sosial-iqtisadi dirçəlişinə töhfə verir.
Azərbaycan–Qazaxıstan münasibətləri təkcə ikitərəfli səviyyədə deyil, həm də Türk Dövlətləri Təşkilatı (TDT), İslam Əməkdaşlıq Təşkilatı (İƏT) və BMT kimi beynəlxalq qurumlar çərçivəsində sıx əməkdaşlıqla xarakterizə olunur. Hər iki ölkə Türk dünyasının siyasi, iqtisadi və mədəni birliyinin möhkəmlənməsi istiqamətində öncül rol oynayır.
Prezident İlham Əliyevin “xalqlarımızı çoxəsrlik dostluq, qardaşlıq və ortaq mənəvi dəyərlər birləşdirir” fikri bu münasibətlərin dərin fəlsəfi və mədəni əsaslarını ifadə edir. Bu baxımdan, Azərbaycan və Qazaxıstan təkcə dövlətlərarası tərəfdaş deyil, bir-birinin tarixi və mədəni yaddaşının daşıyıcısı kimi çıxış edir.
Prezident İlham Əliyevin Qazaxıstana səfəri Azərbaycan–Qazaxıstan münasibətlərində yeni mərhələnin başlanğıcıdır. İmzalanan sənədlər, aparılan danışıqlar və bəyanatlar göstərir ki, bu iki qardaş ölkə qarşılıqlı inam və strateji maraqlara əsaslanan uzunmüddətli əməkdaşlıq kursunu davam etdirəcək.
Bu səfər, həmçinin Türk dünyasının siyasi konsolidasiyasına, Avrasiya məkanında sabitliyin və inkişafın möhkəmlənməsinə yönəlmiş mühüm addım kimi qiymətləndirilməlidir. Azərbaycan və Qazaxıstanın birgə səyləri regionda sülh, təhlükəsizlik və iqtisadi rifahın təmin edilməsində həlledici rol oynayacaq.
