Misir-Azərbaycan əlaqələri genişlənir

Nailə Sadıqova

YAP Suraxanı rayon təşkilatının fəal üzvü

Suraxanı rayonu, 275 nömrəli tam orta məktəbin direktor müavini

İyunun 8-də Azərbaycan prezidenti İlham əliyevin Misirə rəsmi səfəri zamanı ikitərəfli münasibətlərin gələcək inkişafı və qarşılıqlı maraq doğuran sahələrdə birgə səylərin möhkəmləndirilməsi məqsədilə prezident əbdülfəttah əs-Sisi ilə görüşüb.  İki dost ölkənin dövlət başçıları müxtəlif sahələrdə iqtisadi, humanitar-mədəni əlaqələrin sürətlə inkişaf etdiyini, qarşılıqlı faydalı əməkdaşlığın geniş perspektivləri olduğunu vurğulayıblar. Belə ki, tərəflər inşaat, nəqliyyat, əczaçılıq, neft və infrastruktur sahələrində mümkün əməkdaşlıq imkanlarını müzakirə edib, həmçinin Azərbaycanla Misir arasında birgə komissiyanın fəaliyyətinin və növbəti iclasının təşkilinin əhəmiyyətini qeyd ediblər.

Səfər hər iki ölkənin tərəfdaşlığın möhkəmləndirilməsinə, sıx əməkdaşlıq vasitəsilə inkişaf sahələrində səylərin dəstəklənməsinə dəyişməz sadiqliyinin sübutudur. Müzakirələr əməkdaşlığın səviyyəsinin və dərinliyinin artırılmasına, siyasi dialoqun inkişafına, iqtisadi, ticarət və mədəni əlaqələrin inkişafına yönəldiləcək.

Prezident Əs-Sisi Misirdə xarici investorlar üçün maneələrin aradan qaldırılmasının, əlverişli şəraitin yaradılmasının və hüquqi prosedurların sadələşdirilməsinin vacibliyini vurğulayıb. Misirin "Afrikaya qapı" rolunu vurğulayaraq iki ölkə arasında sərbəst ticarət haqqında sazişlərin həlledici əhəmiyyətini qeyd edib.  Hazırda Azərbaycanın ticarət, sənaye və xidmət sahələrində Misir kapitallı 51-ə yaxın şirkət fəaliyyət göstərir ki, bu da ticarət əlaqələrinin genişləndirilməsi üçün böyük potensialın olduğunu göstərir. 2023-cü ilin sonunda iki ölkə arasında əmtəə dövriyyəsi 15,1 milyon dollara çatıb.

Azərbaycan və Misir enerji sahəsində də tərəfdaşlıq qurublar və onun daha da inkişafı gözlənilir, çünki SOCAR və Misir Dövlət Neft Şirkəti əməkdaşlığı genişləndirməyi planlaşdırırlar. Turizm inkişaf edən digər sahədir: son illərdə Azərbaycana səfər edən misirli turistlərin sayı 50 faiz artıb. Bakı və Şarm əl-Şeyx arasında müntəzəm reyslər, o cümlədən həftəlik AirCairo reysləri bu inkişaf edən sektoru dəstəkləyir.

Prezident İlham Əliyevin rəsmi səfər çərçivəsində Qahirədə Əl-Əzhəri Şərifin şeyxi, böyük imam Əhməd Məhəmməd Əhməd Əl Tayyib ilə görüşü də Misir və digər ərəb ölkələrinin mediasının diqqət mərkəzində olub. “Əl Əhram”, “Dostor”, “Əl Qahira”, Səudiyyə Ərəbistanın “Əş Şarq Əl-Ausət” qəzetləri, həmçinin “Egypt1” dövlət televiziyası, “ExtraNews”, “Nile1” telekanallarının materiallarında Prezident İlham Əliyevin bu görüş əsnasında bütövlükdə ərəb dövlətləri ilə əlaqələrin inkişaf etdirilməsinin Azərbaycanın xarici siyasətinin prioritet istiqamətlərindən biri olduğunu vurğuladığı qeyd edilib. Diqqətə çatdırılıb ki, Azərbaycanın dövlət başçısı Bakının Əl-Əzhər ilə birlikdə dini liderlərin növbəti görüşünün COP29 çərçivəsində keçirilməsi təşəbbüsü ilə çıxış etdiyini bildirib.

 Prezidentin səfəri çərçivəsində Azərbaycan və Misirin əlaqələri ölkələr arasında islam həmrəyliyinin güclənməsinə töhfə verəcək.