Azərbaycanın ictimai və siyasi həyatında xüsusi yeri olan şəxsiyyətlərdən biri də ölkənin Birinci vitse-prezidenti, Heydər Əliyev Fondunun prezidenti Mehriban Əliyevadır. Onun fəaliyyəti təkcə vəzifə borcu ilə yox, eyni zamanda dərin humanist duyğularla, şəfqət və qayğı ilə yoğrulub. Bu gün Azərbaycan cəmiyyətində bir çox insanlar çətinliyə düşəndə, köməyə ehtiyac duyanda ilk yada düşən şəxs məhz Mehriban xanımdır. Çünki o, daim xalqın yanında olub – həm sevincdə, həm də ağır günlərdə.
Mehriban Əliyevanın rəhbərlik etdiyi Heydər Əliyev Fondu illərdir ki, uşaqlar, xəstələr, aztəminatlı ailələr, məcburi köçkünlər və əlillər üçün genişmiqyaslı sosial layihələr həyata keçirir. Təhsil, səhiyyə, mədəniyyət və sosial rifah sahələrində reallaşdırılan proqramlar sayəsində minlərlə insanın həyatına müsbət dəyişikliklər gətirilib. Xüsusilə talassemiyalı və hemofiliyalı uşaqlara yardım, xüsusi qayğıya ehtiyacı olan şəxslərə tibbi dəstək, məktəb və uşaq bağçalarının inşası onun fəaliyyəti ilə bağlı ən önəmli nümunələrdəndir.
Mehriban xanımın fərqləndirici xüsusiyyətlərindən biri də səmimiyyətidir. O, sadəcə vəzifə sahibi olaraq yox, ana, bacı, övlad və vətəndaş kimi yanaşır insanlara. Onunla görüşən hər kəs bu istiliyi hiss edir. Ən ucqar bölgələrdə belə insanlar deyirlər: “Prezidentə çatmaq üçün ilk Mehriban xanıma ümid edirik. Çünki o, xalqın səsini eşidən bir insandır.”
Mehriban Əliyeva həmçinin Azərbaycanın mədəniyyətinin dünyaya tanıdılmasında böyük rol oynayır. Onun təşəbbüsü ilə muğam sənəti UNESCO tərəfindən Qeyri-maddi mədəni irs siyahısına daxil edilib. O, Azərbaycan musiqisini, incəsənətini və tarixini beynəlxalq səviyyədə təbliğ edərək ölkəmizin mədəni diplomatiyasına önəmli töhfə verir.
Eyni zamanda, Mehriban xanım ölkə başçısı İlham Əliyevin ən etibarlı silahdaşı və ən güclü dəstəkçisidir. Onların birgə fəaliyyəti Azərbaycanı həm daxildə güclü və dayanıqlı, həm də beynəlxalq arenada etibarlı tərəfdaş kimi təqdim edir. Mehriban Əliyeva dövlətin strateji qərarlarının həyata keçirilməsində fəal iştirak edir, sosial sahədə isə Prezidentin siyasətinin ən incə detalları ilə reallaşdırılmasına xidmət edir. Onun fəaliyyəti, sözlərlə yox, əməllərlə danışır. Bu əməllər Azərbaycan insanının qəlbində dərin iz buraxır.
