Çin və Azərbaycan arasında əlaqələr qədim tarixə malikdir

Prezident cənab İlham Əliyev yanvarın 20-də Davosda Çinin CGTN telekanalına müsahibə vermişdir. Müsahibə fevralın 11-də CGTN televiziya kanalında yayımlandı. Geniş variantda təqdim edilən həmin müsahibə bir daha Azərbaycan reallıqlarının, dövlətimizin daxili və xarici siyasətinin uğurlarının, beynəlxalq münasibətlər sistemində yerinin, mövqeyinin təqdimatında  əhəmiyyətli rol oynadı.

Müsahibəsində bir çox məsələlərə aydınlıq gətirən Dövlət başçısı ilk olaraq 30 il ərzində ərazi bütövlüyümüzün bərpasının bizim hədəfimizə çevrilməsindən söz açdı.  Cənab İlham Əliyev hər bir müsahibəsində, çıxışında öncə diqqəti Azərbaycanın ərazi bütövlüyünü və suverenliyini tam bərpa etməsinə, onun yaratdığı reallıqlara yönəldir. Sözügedən müsahibə də bu baxımdan diqqətdə oldu.

Bugünümüzün reallığı budur ki, Azərbaycan Cənubi Qafqaz və Xəzər regionunda etibarlı mövqe tutur. Dövlət başçısı İlham Əliyev həmin müsahibədə jurnalistin Azərbaycanın hazırda çoxqütblü dünyada yerinin harada olması ilə bağlı sualına cavab olaraq bildirdi ki, biz ən başdan, müstəqilliyimiz bərpa ediləndən bəri olduğumuz yerdəyik.

Azərbaycan güclü, özünü təmin edən iqtisadiyyat qurdu. Ümumi daxili məhsula nisbətdə xarici borcun səviyyəsi cəmi 6,9 faizdir. Buna əsaslanaraq regionda bağlantılar yaradan genişmiqyaslı layihələr həyata keçirmişik və aid olduğumuz Cənubi Qafqaz və Xəzər regionunda etibarlı mövqe tutmuşuq. Əlbəttə ki, milli maraqlarımızı, həyat tərzimizi və müstəqil siyasətimizi qəti şəkildə müdafiə etmişik və çoxlu uğur qazanmışıq.

Dünya xəritəsində nisbətən yeni olan Azərbaycanın öz milli maraqlarını müdafiə edən və bütün dünyada yaxşı əlaqələr quran ölkə kimi nümunəsi onu göstərir ki, cəmiyyətdə sabitlik, birlik varsa, siz öz maraqlarınızı müdafiə edə bilərsiniz. Coğrafi baxımdan biri-birindən uzaq olan Çin ilə Azərbaycan biri-birindən uzaq məsafədə yerləşsə də, hər iki xalq arasında tarixən dostluq əlaqələri həmişə mövcud olub. Münasibətlərin yaranmasında tarixi İpək yolu vacib rol oynayıb. Bu səbəbdən Çin və Azərbaycan arasında əlaqələr qədim tarixə malikdir.

Ulu Öndər Heydər Əliyevin siyasətini uğurla davam etdirən Prezident cənab İlham Əliyevin apardığı strategiyanın əsaslarından biri olan Çin Xalq Respublikası ilə münasibətlərin inkişafına xüsusi diqqətin ayrılması iqtisadi, siyasi, mədəni sahələrdə əməkdaşlıq əlaqələri artıq yeni mərhələyə qədəm qoymuşdur. Ölkəmizin xaricdə təsis etdiyi ilk diplomatik nümayəndəliklərindən birinin məhz Çin Xalq Respublikasında açılması bu dövlətə verilən diqqətdir.

Prezident İlham Əliyevin müsahibəsi Azərbaycanın daxili və xarici siyasətinin aydın xəttini, strateji hədəflərini və uğurlarını bir daha təsdiqlədi. Azərbaycanın beynəlxalq arenada artan nüfuzu və müstəqil siyasət kursu, ölkənin iqtisadi və sosial sahədə daha böyük nailiyyətlər əldə etməsinə zəmin yaradır.