Çexiya dost və qardaş ölkədir

Zəkiyə Hacıyeva

YAP Suraxanı rayon təşkilatının fəal üzvü

Suraxanı rayon Heydər Əliyev Mərkəzinin fondun baş mühafizi

Aprelin 27-də Qəbələdə Azərbaycan Respublikasının Prezidenti İlham Əliyev və Çexiya Respublikasının baş naziri Andrey Babiş mətbuata bəyanatla çıxış ediblər. Azərbaycan dünya bazarlarına öz enerji resurslarını ixrac edən ən etibarlı ölkələr sırasındadır. Avropa ittifaqı bunu çox yüksək qiymətləndirir. Məlumat üçün bildirim ki, ölkəmiz 16 ölkəyə qaz ixrac edir ki, onlardan 10 ölkə Avropada yerləşir. 

Azərbaycan Avrasiyanın nəqliyyat qovşağı kimi də Avropa üçün vacibdir. Bakı-Tbilisi-Ceyhan neft kəməri,Cənub Qaz Dəhlizi və Bakı-Tbilisi-Qars dəmir yolu Avropanın Orta Asiya və Yaxın Şərqlə əlaqələrini gücləndirib. Bu səfər iki ölkə arasındakı əlaqələrin dinamik şəkildə  inkişafını, möhkəm dostluq, birgə yaşayış və inkişafını göstərir. Azərbaycan Respublikasının Prezidenti İlham Əliyev və Çexiyanın baş naziri Andrey Babiş mətbuata birgə bəyanatında bunları söyləyib:”- Bu gün bir çox məsələlər ətrafında həm regional, həm ikitərəfli, həm də qlobal xarakter daşıyan məsələlər ətrafında fikir mübadiləsi aparılmışdır”.

Çexiya dövləti ilə əməkdaşlıq digər sahədə - həm də müdafiə sənayesi ilə bağlıdır. Biz Çexiyadan bir çox hərbi təyinatlı məhsullar alırıq və indiki mərhələdə birgə istehsal ilə bağlı konkret layihələr üzərində danışıqlar gedir. Bu isə o deməkdir ki, gələcəkdə  ölkəmiz öz müdafiə potensialını yerli istehsal hesabına təmin edəcək.

Hazırda bu ölkə ilə ticarət dövrüyəmiz 800 milyon dollardan çoxdur. Burada əsasən, Azərbaycan neftinin ixracı nəzərə çarpır. Əməkdaşlığımızın böyük hissəsinin energetika sektoruna aid olması bu xalqların və dövlətlərin uzun illər bir-birlərini etibarlı və sadiq tərəfdaş kimi tanımalarıdır. Xüsusilə cənab Prezident vurğulayıb ki, baş nazirlə birlikdə Çexiyadan Azərbaycana böyük qrup iş adamları gəlmişdir. Bizim çox böyük ümidimiz ondan ibarətdir ki, ticarət dövrüyəmizi daha da yüksək səviyyəyə qaldıracağıq.

Bu baxımdan qarşıya qoyulan əsas məqsədlərdən biri ticarətin şaxələndirilməsi, qeyri-neft sektorunun payının artırılması və qarşılıqlı sərmayələrin genişləndirilməsidir.Görüşdə müzakirə edilən konkret layihələr bu istiqamətdə real addımların atılacağını  deməyə əsas verir.