Azərbaycanın müstəqilliyi ərzində Dünya Azərbaycanlılarının Həmrəylik Günü daha geniş məna kəsb etmişdir
Nəzrin Mirzəli
YAP Suraxanı rayon təşkilatının və Hövsan Bələdiyyəsinin üzvü
Suraxanı rayonu, 270 saylı körpələr evi uşaq baxçası – tərbiyəçi müəllimi
31 Dekabr – Dünya Azərbaycanlılarının Həmrəylik Günü Azərbaycan xalqının milli birlik, həmrəylik və vətənpərvərlik ruhunu ifadə edən ən mühüm əlamətdar günlərdən biridir. Bu gün dünyanın müxtəlif ölkələrində yaşayan milyonlarla azərbaycanlını bir amal, bir kimlik və bir Vətən ətrafında birləşdirir.
Həmrəylik Günü təkcə təqvimdə qeyd olunan bayram deyil, eyni zamanda xalqımızın tarixi yaddaşını, milli özünüdərkini və gələcəyə yönəlmiş birliyini simvolizə edir. Dünya Azərbaycanlılarının Həmrəylik Gününün əsası 1989-cu ilin dekabr ayında qoyulmuşdur. Həmin dövrdə Azərbaycan xalqı uzun illər davam edən siyasi, ideoloji və milli təzyiqlərə qarşı öz etiraz səsini ucaltmağa başlamışdı.
1989-cu il dekabrın 31-də Araz çayı boyunca yaşayan azərbaycanlılar sərhəd maneələrini sökərək bir-biri ilə qovuşdular. Bu hadisə tarixi baxımdan olduqca böyük əhəmiyyət daşıyırdı, çünki o, parçalanmış xalqın birliyə olan güclü istəyini bütün dünyaya nümayiş etdirdi.
2020-ci ildə Vətən müharibəsində əldə olunan Zəfər bir daha göstərdi ki, dünyanın harasında yaşamasından asılı olmayaraq bütün azərbaycanlılar eyni amal uğrunda birləşə bilir. Həmrəylik Günü bu birlik ruhunun təcəssümü kimi daha da dərin məna qazandı.
