Azərbaycan ilə Kamboca arasında dostluq münasibətləri və siyasi əlaqələr yüksək səviyyədədir

Yusif İbrahimov

12 oktyabr 2026-cı il tarixində Azərbaycan Respublikasının Prezidenti İlham Əliyev və Kamboca Krallığının Baş naziri Hun Manet Azərbaycanda keçirilən görüş zamanı mətbuata bəyanatlarla çıxış etmişlər. Görüşdə iki ölkə arasında mövcud münasibətlər, siyasi və iqtisadi əməkdaşlığın genişləndirilməsi, eləcə də beynəlxalq təşkilatlar çərçivəsində qarşılıqlı fəaliyyət məsələləri müzakirə olunmuşdur. Cənab İlham Əliyev çıxışında Azərbaycan ilə Kamboca arasında dostluq münasibətlərinin və siyasi əlaqələrin yüksək səviyyədə olduğunu bildirmişdir. Qeyd olunmuşdur ki, hər iki ölkə Birləşmiş Millətlər Təşkilatı, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə çərçivəsində fəal əməkdaşlıq edir və bir-birini dəstəkləyir.

Bəyanatda iqtisadi və ticarət əlaqələrinin inkişaf etdirilməsi əsas məsələlərdən biri kimi diqqətə çatdırılmışdır. Tərəflər qarşılıqlı investisiyaların artırılması, birgə istehsal müəssisələrinin yaradılması və sahibkarlar arasında əlaqələrin gücləndirilməsi imkanlarını müzakirə etmişlər. Bu məqsədlə ticarət və investisiya sahəsində əməkdaşlığın inkişafına xidmət edən birgə işçi qrupunun yaradılması barədə razılıq əldə olunmuşdur. Görüş zamanı təhsil, turizm, nəqliyyat və rəqəmsal transformasiya sahələrində əməkdaşlığın genişləndirilməsi məsələlərinə də toxunulmuşdur. Cənab İlham Əliyev keçmişdə yüzlərlə kambocalı tələbənin Azərbaycanda təhsil aldığını xatırladaraq, bu ənənənin bərpa olunmasının və tələbə mübadiləsinin inkişaf etdirilməsinin əhəmiyyətini vurğulamışdır. Həmçinin Kambocanın Azərbaycanın “ASAN xidmət” modelinə maraq göstərməsi dövlət xidmətləri sahəsində təcrübə mübadiləsi üçün mühüm imkan kimi qiymətləndirilmişdir.

Hər iki ölkə üçün aktual olan mina təhlükəsi məsələsi də bəyanatda qeyd edilmişdir. Bu sahədə təcrübə və bilik mübadiləsinin aparılması, müvafiq təlimlərin keçirilməsi vacib hesab olunmuşdur. Bununla yanaşı, beynəlxalq hüququn norma və prinsiplərinə, dövlətlərin suverenliyinə və ərazi bütövlüyünə hörmətin sülh və təhlükəsizliyin təmin olunmasında mühüm rol oynadığı vurğulanmışdır. Kambocanın Baş naziri Hun Manet Azərbaycan tərəfinə göstərilən qonaqpərvərliyə görə təşəkkürünü bildirmiş, iki ölkə arasında əməkdaşlığın gələcəkdə daha da genişləndirilməsinə maraqlı olduqlarını qeyd etmişdir. Səfər çərçivəsində ticarət, təhsil və digər perspektivli sahələr üzrə əməkdaşlığın inkişafı üçün üç sənəd imzalanmışdır.

Prezident Cənab İlham Əliyevin bəyanatı Azərbaycan ilə Kamboca arasında dostluq münasibətlərinin möhkəmləndirilməsi, iqtisadi əlaqələrin genişləndirilməsi və qarşılıqlı faydalı əməkdaşlığın inkişaf etdirilməsi baxımından mühüm əhəmiyyət daşıyır.