Azərbaycançılıq Məfkurəsi: Ulu Öndərin Mirası olan Dünya Azərbaycanlılarının Həmrəyliyi Günü qeyd olunur
Xəyalə Əzizova
YAP Suraxanı rayon təşkilatının ƏPT-nin sədri
Suraxanı rayonu, 101 nömrəli tam orta ümumtəhsil məktəbi publik hüquqi şəxsin direktoru
Azərbaycançılıq ideologiyasının əsasını Ümummilli Lider Heydər Əliyev qoymuşdur. O, hər zaman qeyd edirdi ki, hər bir insan üçün onun milli mənsubiyyəti ən böyük qürur mənbəyidir. Ulu Öndərin "Mən həmişə fəxr etmişəm, bu gün də fəxr edirəm ki, mən azərbaycanlıyam!" kəlamı hər bir həmvətənimiz üçün milli qürur rəmzinə çevrilmişdir. Bu fəlsəfə, dünyada yaşayan milyonlarla azərbaycanlını vahid dövlətçilik maraqları ətrafında toplamağı hədəfləyən geniş bir milli hərəkatın özəyidir. Dünya azərbaycanlılarının birliyi ideyasının kökündə Azərbaycan dövlətçiliyinə, xalqımızın zəngin dilinə, qədim dininə və milli-mənəvi varlığına dərin hörmət dayanır. Ulu Öndər bu məfkurəni parçalanmış xalqı birləşdirən mənəvi körpü kimi görürdü.
Bu gün cənab Prezident İlham Əliyev tərəfindən bu məfkurə daha da zənginləşdirilir və dövlət siyasətinin sarsılmaz ana xəttinə çevrilir. Cənab Prezident vurğulamışdır ki, bizim bir vətənimiz var - Azərbaycan, bir dilimiz var - Azərbaycan dili və bir ümumxalq ideologiyamız var - azərbaycançılıq məfkurəsi. Ulu Öndərin müəyyən etdiyi bu yol xalqımızı qlobal dünyada öz milli kimliyini qorumağa və müstəqil dövlətçilik uğrunda mübarizəyə səfərbər edir. Cənab Prezidentin rəhbərliyi ilə azərbaycançılıq artıq bütün dünyada bir həyat tərzi və milli birlik modeli kimi qəbul edilir. Bu ideologiya sayəsində xaricdə yaşayan soydaşlarımız özlərini Azərbaycanın ayrılmaz bir parçası hiss edirlər.
Azərbaycançılıq sadəcə bir termin deyil, o, dünyada yaşayan bütün azərbaycanlıların öz dövlətinə arxalanması və ona hər şəraitdə sadiq qalması deməkdir. Cənab Prezident İlham Əliyev bütün xarici səfərlərində diaspor nümayəndələrinə bildirir ki, onların arxasında güclü, müstəqil və qalib Azərbaycan dövləti dayanır. Ulu Öndər Heydər Əliyevin ideyaları əsasında formalaşan bu birlik, xalqımızın şanlı tarixini yazan və onu gələcək nəsillərə qüsursuz şəkildə ötürən sarsılmaz bir körpüdür. Bu gün azərbaycançılıq eyni zamanda dözümlülük, multikulturalizm və digər xalqlarla sülh şəraitində yaşamaq bacarığını da özündə birləşdirir.
Ulu Öndərin bu dahi mirası cənab Prezident İlham Əliyevin rəhbərliyi ilə yeni bir inkişaf mərhələsinə qədəm qoyub. İndi hər bir azərbaycanlı üçün bu məfkurə sadəcə bir nəzəriyyə deyil, həm də gündəlik fəaliyyət prinsipləridir. Xaricdə yaşayan soydaşlarımız Azərbaycan dilini qoruyur, mədəniyyətimizi təbliğ edir və dövlətimizin haqq səsini dünyaya çatdırırlar. Bu mütəşəkkillik məhz azərbaycançılıq ideologiyasının gücündən qaynaqlanır. Ulu Öndər Heydər Əliyevin ruhu qarşısında hər birimiz borcluyuq ki, bu müqəddəs bayrağı hər zaman uca tutaq və gələcək nəsillərə daha güclü bir azərbaycançılıq ruhu miras qoyaq.
