Azərbaycan dilinin dövlət dili kimi yaşaması – Ulu Öndərin bizə qoyduğu müqəddəs vəsiyyətdir.
Gülşən Yusubova
YAP Suraxanı rayon təşkilatının fəal üzvü
Suraxanı rayonu, 30 saylı ambulatoriyanın baş həkimi
27 aprel 1978-ci il tarixi müstəqil Azərbaycan Respublikasının dövlətçilik tarixində, milli kimliyimizin qorunması və gələcək nəsillərə ötürülməsi baxımından mühüm əhəmiyyət kəsb edir. Məhz bu gün Azərbaycan SSR-in yeni Konstitusiyasına Azərbaycan dilinin dövlət dili kimi təsbit olunması Ulu Öndər Heydər Əliyevin təşəbbüsü və siyasi iradəsi nəticəsində mümkün olmuşdur.
O dövrdə sovet sisteminin sərt ideoloji çərçivələrində belə bir qərarın qəbul edilməsi böyük siyasi cəsarət və uzaqgörənlik tələb edirdi. Ulu Öndər Heydər Əliyev milli dəyərlərimizin qorunmasına, xüsusilə də ana dilimizin inkişafına daim xüsusi diqqət göstərmiş, Azərbaycan dilinin dövlət səviyyəsində hüquqi status qazanmasına nail olmuşdur. Bu, yalnız bir hüquqi addım deyildi – bu, eyni zamanda milli ruhun, mədəniyyətin və kimliyin qorunması uğrunda atılmış strateji bir addım idi.
Heydər Əliyev Azərbaycan dilinin dövlət səviyyəsində qorunması və inkişafı ilə bağlı dəfələrlə mühüm fikirlər səsləndirmişdir:
“Hər bir xalqın milli-mənəvi dəyərlərinin əsasını onun ana dili təşkil edir. Ana dili hər bir insanın qürur mənbəyidir, onun ruhunun, düşüncəsinin ifadəsidir.”
Digər bir çıxışında isə Ulu Öndər vurğulayırdı:
“Azərbaycan dili bizim milli sərvətimizdir. Onun qorunması və inkişafı hər bir azərbaycanlının borcudur.”
Məhz Ulu Öndərin ideoloji xəttinin davamı olaraq bu gün müstəqil Azərbaycan Respublikasında Azərbaycan dili təkcə hüquqi müstəvidə deyil, həm də ictimai, elmi, mədəni və informasiya məkanında dominant mövqedədir. Prezident İlham Əliyevin rəhbərliyi ilə bu siyasət uğurla davam etdirilir, dilimizin təmizliyi, saflığı və zənginliyinin qorunması istiqamətində mühüm addımlar atılır.
Bu tarixi gün münasibətilə Azərbaycan dilinin dövlət dili kimi Konstitusiyaya salınmasını təşəbbüs edən və bu sahədə misilsiz xidmətləri olan Ulu Öndər Heydər Əliyevin əziz xatirəsi dərin ehtiramla anılır. Onun dilimizə göstərdiyi qayğı və sevgi bu gün hər bir Azərbaycan vətəndaşı üçün nümunədir.
