YAP-ın VIII Qurultayında ölkə rəhbərinin biz gənclərə ötürdüyü mesajlar…
Yusif Quliyev
Azərbaycan Memarlıq və İnşaat Universiteti Tələbə Gənclər Təşkilatının sədri
Yeni Azərbaycan Partiyasının gənc fəal üzvü və VIII Qurultayının nümayəndəsi
Biz, müstəqillik tariximizin ən şərəfli dövründə yaşayan, ərazi bütövlüyü və suverenliyi tam təmin olunmuş bir ölkənin gəncləriyik. Bu gün hər bir gənc YAP üzvü fəxrlə dərk edir ki, Azərbaycanın xarici siyasəti son illərdə əhəmiyyətli uğurlarla müşayiət olunmuşdur. Ölkəmiz müxtəlif beynəlxalq təşkilatlarda fəal iştirak edir, regional əməkdaşlıq təşəbbüslərində mühüm rol oynayır və müxtəlif siyasi qütblərlə balanslaşdırılmış münasibətlər qurur.
Heydər Əliyev Mərkəzində keçirilən YAP-ın VIII Qurultayı bir gənc olaraq bizlər üçün sadəcə partiya tədbiri deyil, məhz bu uğurların və dövlətimizin beynəlxalq arenadakı çoxşaxəli tərəfdaşlıq xəttinin növbəti nümayişi oldu. Partiyamızın Sədri, Müzəffər Ali Baş Komandan cənab İlham Əliyevin rəhbərliyi ilə Azərbaycanın həm Şərq, həm də Qərb dövlətləri ilə strateji tərəfdaşlıq əlaqələri ölkəmizin beynəlxalq nüfuzunun əvəzolunmaz göstəricisidir. Eyni zamanda ölkəmiz öz milli maraqlarını qorumaqla yanaşı, regional sabitliyin və əməkdaşlığın gücləndirilməsi istiqamətində də mühüm təşəbbüslərlə çıxış edir.
İqtisadi sahədə əldə olunan nailiyyətlər də hər birimizin qürur mənbəyi və Azərbaycanın inkişaf strategiyasının mühüm tərkib hissəsidir. Son illərdə ölkədə makroiqtisadi sabitlik qorunmuş, xarici borcun səviyyəsi minimum həddə endirilmiş, valyuta ehtiyatları isə əhəmiyyətli dərəcədə artırılmışdır. Xarici investisiyaların cəlb olunması istiqamətində həyata keçirilən siyasət nəticəsində Azərbaycan regionun ən cəlbedici investisiya məkanlarından birinə çevrilmişdir. YAP-ın VIII Qurultayı gəncliyimiz qarşısında yeni üfüqlər açdı; cənab Prezidentin qurultaydakı tarixi çıxışında bəyan etdiyi iqtisadi hədəflər, innovativ layihələr və investisiya forumlarında imzalanan çoxmilyardlıq müqavilələr ölkəmizin iqtisadi potensialına olan beynəlxalq etimadın göstəricisidir.
Enerji sektoru Azərbaycanın iqtisadi və geosiyasi gücünün əsas dayaqlarından biri olaraq qalır. Ölkə neft, qaz, neft məhsulları, elektrik enerjisi və digər enerji resurslarının istehsalı və ixracı sahəsində mühüm mövqeyə malikdir. Qlobal enerji bazarında baş verən dəyişikliklər fonunda Azərbaycanın etibarlı enerji tərəfdaşı kimi rolu daha da artır. YAP-ın VIII Qurultayında gənc nümayəndələrin də böyük diqqətlə izlədiyi və ölkəmizin beynəlxalq münasibətlər sistemində strateji əhəmiyyətini yüksəldən əsas faktorlar sırasında məhz bu qlobal enerji təhlükəsizliyi mövqeyimiz xüsusi yer tutur.
Bununla yanaşı, nəqliyyat-logistika sahəsində həyata keçirilən layihələr də Azərbaycanın regional tranzit mərkəzinə çevrilməsinə xidmət edir. Orta Dəhliz və Şimal-Cənub nəqliyyat marşrutlarının inkişafı ölkəmizin geoiqtisadi əhəmiyyətini artırmaqla yanaşı, yeni investisiyaların cəlb edilməsinə və gənclərimiz üçün minlərlə yeni iş yerinin yaradılmasına imkan yaradır. Azərbaycanın Avropa ilə Asiya arasında körpü rolunu gücləndirməsi onun beynəlxalq mövqeyinin daha da möhkəmlənməsinə şərait yaradır.
Hazırda dövlət siyasətinin əsas istiqamətlərindən biri də Qarabağ və Şərqi Zəngəzurun bərpası və inkişafıdır. Azad edilmiş ərazilərdə genişmiqyaslı quruculuq işləri aparılır, müasir infrastruktur yaradılır və keçmiş məcburi köçkünlərin doğma torpaqlarına qayıdışı təmin edilir. “Böyük Qayıdış” proqramı çərçivəsində həyata keçirilən tədbirlər yalnız sosial və iqtisadi məqsədlər daşımır, həm də milli həmrəyliyin və tarihi ədalətin bərpasının mühüm təzahürü kimi çıxış edir. Biz gənclər tam suverenlik şəraitində keçirilən ilk böyük siyasi forum olan YAP-ın VIII Qurultayından aldığımız ideoloji güclə bu quruculuq prosesinin ön cəbhəsində yer almağa hazırıq.
Nəticə etibarilə, Azərbaycan yeni tarixi mərhələyə qədəm qoymuşdur. Ərazi bütövlüyünün və suverenliyin tam təmin olunması, iqtisadi inkişafın davamlı xarakter alması, beynəlxalq nüfuzun artması və milli maraqlara əsaslanan dövlət siyasəti ölkəmizin gələcək inkişafı üçün möhkəm zəmin yaradır. YAP-ın VIII Qurultayında ölkə rəhbərinin biz gənclərə ötürdüyü mesajlardan irəli gələrək, qarşıda duran vəzifələrin uğurla həyata keçirilməsi üçün var qüvvəmizlə çalışacağıq. Bu proses Azərbaycanın regionda və beynəlxalq arenada mövqeyini daha da gücləndirəcək, müstəqil dövlətçilik modelinin davamlı inkişafını təmin edəcəkdir.
