Türk Dövlətləri Təşkilatının IX Zirvə Görüşündə liderlərə bərpa prosesi ilə bağlı ətraflı məlumat verilib
Gülnarə Mehtiyeva
YAP Suraxanı rayon təşkilatının üzvü
Suraxanı rayonu 318 nömrəli məktəbin müəllimi
Artıq 2 ildir ki, Azərbaycan xalqı olaraq torpaqlarımızın işğaldan azad olunmasının sevincini və qürurunu yaşayırıq. 44 günluk Vətən müharibəsində Prezident, Müzəffər Ali Baş Komandan İlham Əliyevin rəhbərliyi ilə Rəşadətli Ordumuz torpaqlarımızı işğaldan azad etdi, düşmənin hərbi birləşmələri darmadağın olundu. Bunun nəticəsində işğalçı Ermənistan məğlubiyyəti etiraf edərək kapitulyasiya aktına imza atmaq məcburiyyətində qaldı. İkinci Qarabağ Müharibəsi zəfəri böyük qələbə, ədalətin təcəssümüdür.
Post müharibə dönəmində qarşıda dayanan əsas vəzifələrimizdən ən əsası olan azad olunmuş ərazilərdə quruculuq işlərinin həyata keçirilməsinin xeyli hissəsini demək olar ki yerinə yetirmişik. Prezident İlham Əliyevin işğaldan azad olunmuş rayonlara mütəmadi səfərləri xalqımız tərəfindən böyük ruh yüksəkliyi ilə qarşılanır. Azad olunmuş ərazilərdə böyük inkişafın təməlləri çoxdan atılmışdır. Məqsəd yalnız ölkə səviyyəsində deyil, həm də uğurlu inteqrasiyaya nail olmaqla, regional və beynəlxalq səviyyələrdə inkişafı təmin etməkdir. 30 ilə yaxın erməni vandalizminə məruz qalan torpaqlarımızda artıq canlanmanın və məşskunlaşmanın şahidiyik. Cənab Prezidentin ilk növbədə, Füzuli rayonunda Horadiz-Ağbənd dəmir yolu xəttinin təməlini qoyması buna bariz nümunədir. Bu olduqca əhəmiyyəti hadisədir. Sözügedən dəmir yolu xətti nəinki ölkəmizin, həm də bütün regionun gələcək inkişafı üçün strateji əhəmiyyət daşıyır.
Ümumi uzunluğu 100 km olan bu nəqliyyat infrastrukturu Azərbaycan vətəndaşlarının azad edilmiş torpaqlara rahat gediş-gəlişinin təminatında əhəmiyyətli rol oynayacaqdır. Ən əsası isə odur ki, bu infrastruktur Türkiyəyə qədər uzanmaqla Bakı-Tbilisi-Ceyhandan sonra Azərbaycanı qardaş ölkə ilə birləşdirən ikinci dəmir yolu şəbəkəsi olacaq. Həmçinin Azərbaycanın əsas hissəsi ilə Naxçıvan Muxtar Respublikası arasında birbaşa əlaqənin yaranmasına böyük töhfədir. Hesab edirəm ki, Azərbaycanın uzun illər təhlükəsiz tranzit ölkə kimi qazandığı nüfuz və maliyyə resursları ona növbəti mərhələyə keçmək imkanı verəcəkdir.
Cənab Ali Baş Komandanın nəinki azad olunmuş ərzilərə səfərləri, eyni zamanda bütün xarici səfərlər hər bir azərbaycanlını qürurlandırır və əlamətdar hadisə kimi tarixin yaddaşına qeyd olunur. Belə səfərlərdən biri də Səmərqənddə keçirilən Türk Dövlətləri Təşkilatının IX Zirvə Görüşüdür. Görüşdə çıxış edən cənab Prezident Qarabağda aparılan sürətli bərpa prosesinə toxunmuş qurulan infrastrukturun bütün Türk dünyasını birləşdirməklə yaxın gələcəkdə regionun türkdilli dövlətləri arasında dərin iqtisadi-siyasi birliyin qurulmasına da böyük töhfə verəcəyini vurğulamışdır. Bu isə böyük bir regionda Azərbaycanın strateji əhəmiyyətini artıracaq, o cümlədən iqtisadi potensialına da təkan verəcəkdir.
İşğaldan azad olunmuş ərazilərdə quruculuq işlərinin aparılmasının daha bir göstəricisi isə Qarabağda “ağıllı kənd” layihəsinin həyata keçirilməsidir. Cənab Prezidentin də qeyd etdiyi kimi bərpa olunacaq ərazilərdə müasir iqtisadi və texnoloji innovasiyaların tətbiqi daha da əlverişli olacaqdır. “Ağıllı kənd” layihəsi Zəngilan rayonunun Ağalı kəndində ilk dəfə tətbiq olunmuşdur. Başlanğıc olaraq inşa edilmiş 200 evdən ibarət kəndin enerjiyə tələbatı yalnız alternativ enerji mənbələrindən əldə olunmuşdur. Bu yolla da ölkəmiz daha geniş aspektdən alternativ enerjinin tətbiqini reallaşdırmış oldu.
Qeyd etmək istəyirəm ki, Qarabağ bölgəsində həyata keçirilən faktiki layihələr bütün ölkə üçün pilot layihə kimi baza rolunu öynayır. Bütövlükdə, bu layihələr bölgənin gələcək inkişafına böyük töhfələr verəcəkdir
