Prezident Türk Dövlətləri Təşkilatının birliyinin əhəmiyyətini xüsusi qeyd edib

Rəvanə Abdullayeva

YAP Suraxanı rayon təşkilatının fəal üzvü

Suraxanı rayonu, 265 saylı körpələr evi və uşaq bağçasının müdiri

2025-ci il oktyabrın 7-də Qəbələ şəhərində Türk Dövlətləri Təşkilatının Dövlət Başçıları Şurasının 12-ci Zirvə Görüşü keçirildi. Bu mötəbər toplantı Türk dünyasının həmrəyliyinin, əməkdaşlığının və birliyinin bariz nümunəsi kimi tarixə düşdü. Zirvədə çıxış edən Azərbaycan Respublikasının Prezidenti cənab İlham Əliyev mühüm və dərin məzmunlu fikirlər səsləndirdi. Prezident cənab İlham Əliyev öz çıxışında qeyd etdi ki, sülh və təhlükəsizlik bu gün hər bir ölkənin inkişafı üçün əsas şərtdir.

Dövlət başçısı onu vurğuladı ki, regionda sabitliyin və qarşılıqlı etimadın möhkəmlənməsi iqtisadi yüksəlişin, sosial rifahın və gələcək nəsillərin təhlükəsiz həyatının təminatı üçün vacibdir. Prezident həmçinin Türk Dövlətləri Təşkilatının birliyinin əhəmiyyətini xüsusi qeyd edərək bildirdi ki, bu əməkdaşlıq yalnız siyasi və iqtisadi sahədə deyil, həm də mədəni, humanitar və təhlükəsizlik istiqamətlərində də möhkəmlənməlidir.

Azərbaycan rəhbəri Türk dünyasının ortaq dəyərlərinə, dilinə və tarixən formalaşmış qardaşlıq bağlarına söykənərək birgə fəaliyyətin gələcəkdə daha da genişlənəcəyinə inamını ifadə etdi.İlham Əliyev çıxışında sülhün və təhlükəsizliyin qorunması istiqamətində Azərbaycanın gördüyü işlərdən də danışdı. O qeyd etdi ki, yalnız ədalətə, beynəlxalq hüquqa və qarşılıqlı hörmətə əsaslanan münasibətlər regionda davamlı sabitlik yarada bilər.

Zirvə görüşü Türk dövlətlərinin birliyini daha da möhkəmləndirdi və bir daha göstərdi ki, sülh, təhlükəsizlik və əməkdaşlıq gələcəyə aparan yeganə yoldur.